Կարո Փայլանը հանդիպել է բանտում գտնվող և հայ-թուրքական սահմանը բացել խոստացած Թուրքիայի նախագահի թեկնածուի հետ

Թուրքիայի քրդամետ Ժողովրդադեմոկրատական կուսակցության անդամ, խորհրդարանի հայագզի պատգամավոր Կարո Փայլանը նախօրեին Էդիրնեի բանտում հանդիպել է կուսակցության նախկին համանախագահ, Թուրքիայի նախագահի թեկնածու Սելահաթթին Դեմիրթաշի հետ, որը շարունակում է կալանքի տակ մնալ 2016 թվականի նոյեմբերից։

Ինչպես հայտնել է Փայլանը Twitter-ի իր պաշտոնական էջում, Դեմիրթաշի հետ նա անցկացրել է մի քանի ժամ, այդ ընթացքում իրենք աշխատել են գործնական թեմաների շուրջ։

«Էդիրնեի բանտում այցելեցի նախագահի մեր թեկնածու Դեմիրթաշին։ Ժամերով աշխատեցինք։ Ձեր փոխանցած հազարավոր բարևները նրան փոխանցեցի, նա էլ ձեզ է բարևում։ Էդիրնեից վերադարձել եմ դրական տրամադրությամբ», - ասել է Փայլանը։

Դեմիրթաշի հետ հանդիպելու համապատասխան թույլտվության համար պատգամավորը Թուրքիայի արդարադատության նախարարություն էր դիմել դեռ մեկուկես տարի առաջ։

Նշենք, որ Սելահաթթին Դեմիրթաշը հայտարարել է, որ նախագահ ընտրվելու դեպքում թուրք-հայկական սահմանը կբացվի։

«Կվերացվի Հայաստանի հանդեպ կիրառվող տնտեսական շրջափակումը, կզարգացվեն անհրաժեշտ քաղաքական, տնտեսական ու դիվանագիտական հարաբերությունները, Թուրքիայի կողմից միակողմանի կերպով փակված հայ-թուրքական սահմանը կբացվի՝ առանց նախապայմանների։ Մենք նաև կաջակցենք Հայաստանի ու Ադրբեջանի միջև առկա արցախյան հիմնախնդրի՝ խաղաղ ճանապարհով լուծման ջանքերին»,- նշված է Դեմիրթաշի նախընտրական ծրագրում։

Աղբյուրը՝ Tert.am