Հայաստանի և ԼՂՀ-ի արձագանքը՝ Ալ. Լապշինին Բաքվին արտահանձնելու մասին (տեսանյութ)

Երեկ երեկոյան բլոգեր Ալեքսանդր Լապշինը Բելառուսից արտահանձնվեց Ադրբեջանին: Հայաստանի ԱԳՆ մամուլի խոսնակ Տիգրան Բալայանը այս առիթով հայտարարություն է տարածել¸ որում ասվում է.

«Ալեքսանդր Լապշինի հետապնդումը, Ադրբեջան նրա արտահանձնումը խոսքի ազատության և ազատ տեղաշարժի, մարդու հիմնարար իրավունքների կոպտագույն ոտնահարում է, որը կրկին անգամ ի ցույց է դնում բռնապետության և ժողովրդավարության միջև առկա խորը անդունդը։
Միանշանակ է, որ քաղաքական, հասարակական, մշակութային գործիչների, լրագրողների, զբոսաշրջիկների հոսքը Արցախ չի կանգնելու, այլ բազմապատկվելու է»։

Հիշեցնենք¸ որ Ալեքսանդր Լապշինը Գերագույն դատարան էր դիմել` բողոքարկելու գլխավոր դատախազության որոշումը՝ արտահանձնման վերաբերյալ: Գերագույն դատարանը սակայն մերժել էր բողոքը:

Այս կապակցությամբ Լեռնային Ղարաբաղի հանրապետության ԱԳՆ տեղեկատվության և հասարակայնության հետ կապերի վարչությունը Artsakhpress գործակալությանը մեկնաբանել է այս որոշումը:

«Բելառուսի Գերագույն դատարանի դատավճիռը, որն ուժի մեջ է թողնում հայտնի բլոգեր Ալեքսանդր Լապշինին քրեական հետապնդման նպատակով Ադրբեջանին հանձնելու որոշումը, ոչ միայն հանդիսանում է Ադրբեջանի կողմից իրականացվող օտարերկրյա քաղաքացիներին ահաբեկելու քաղաքականության ակնհայտ աջակցության դրսևորում, այլև ազատ տեղաշարժի և խոսքի ազատության հիմնարար իրավունքների կոպիտ ոտնահարում։ Մտադիր լինելով, ի պատասխան Բաքվի հայցի, Ադրբեջանին հանձնել Ալեքսանդր Լապշինին՝ շինծու և քաղաքականացված գործի հիման վրա, բելառուսական իշխանությունները ցուցադրում են, որ քաղաքական շահերը վեր են դասում ժողովրդավարական նորմերից, ինչպես նաև օրինականության և արդարության սկզբունքներից»։

Բլոգերի արտահանձնման վերաբերյալ ֆեյսբուքյան էջում գրել է նաև
ԼՂՀ ՄԻՊ Ռուբեն Մելիքյանը.

«Մարդու հիմնարար իրավունքների բուն էությանը հակասող մեղադրանքների հիման վրա հայտնի բլոգեր Ալեքսանդր Լապշինին շուրջ երկու ամիս անազատության մեջ պահելուց հետո՝ փետրվարի 7-ին, Բելոռուսը նրան հանձնել է Ադրբեջանին:

Լապշինի քրեական հետապնդումը նախաձեռնելով Ադրբեջանը նպատակ է հետապնդել նախադեպ ձևավորելով լռեցնել Արցախի վերաբերյալ ազատ խոսքը և վախեցնել Արցախ այցելել ցանկացողներին:

Այնուհանդերձ, Ադրբեջանին չի հաջողվելու Լապշինի գործը դարձնել իրավական նախադեպ, քանի որ դրա հիմքում ընկած փաստարկումը մերժելի է ժողովրդավարական բնույթ ունեցող որևէ պետության կամ հաստատության համար:

Ավելին, Լապշինի գործը դառնալու է հակադարձ նախադեպ' մեծացնելով մարդու իրավունքների գաղափարախոսությանն ազնվորեն նվիրված իրավապաշտպանների, խոսքի ազատությանն ազնվորեն նիրված լրագրողների հետաքրքրությունն Արցախի նկատմամբ: Սփյուռքի կառույցներին, հայկական իրավապաշտպան ու լրագրողական համայնքներին կոչ եմ անում ներգրավվել Լապշինի գործը հակադարձ նախադեպ դարձնելու գործընթացին»:

Zham.am