Նիկոլ Փաշինյան. «Մենք բոլոր սցենարներին պատրաստ ենք» (տեսանյութ)
Նիկոլ Փաշինյանը հայտարարում է, որ բոլոր սցենարներով՝ համաժողովրդական շարժումը չի կարող չհաղթել։
«Ազատություն». - Պարոն Փաշինյան, ի՞նչ եք կարծում, սա տանում է յոթ օր հետո վարչապետի նոր ընտրությա՞ն, թե՞ կարծում եք, որ ավելի շուտ կարող է հանգուցալուծվել։
Նիկոլ Փաշինյան. - Դե յուրե պետք է վարչապետի նոր ընտրություն տեղի ունենա, կամ էլ եթե տեղի չի ունենում ընտրությունը, արտահերթ խորհրդարանական ընտրություններ տեղի ունենան։ Գիտեք, մենք վերլուծում ենք սցենարները և, համենայն դեպս, բոլոր սցենարներով՝ համաժողովրդական շարժումը չի կարող չհաղթել։ Տեսնում եք, թե ինչ է կատարվում, և այն ժողովուրդը, որ զգացել է հաղթանակի շունչը, այդ ժողովուրդը չի կարող ձեռքից բաց թողնել հաղթանակը։
«Ազատություն». - Նույնիսկ այն դեպքում, եթե Դուք մյուս շաբաթ էլ չընտրվեք, և իրենք անցկացնեն արտահերթ ընտրություննե՞րը։
Նիկոլ Փաշինյան. – Անկեղծությամբ եմ ասում՝ այն, ինչ էդ կաբինետներում, դահլիճներում տեղի է ունենում, դա արդեն էական չի, էականը սա է, էականը սա է, որ Հայաստանում ժողովուրդ-իշխանություն հին հարաբերություն էլ չի լինելու՝ կապ չունի ով կլինի՝ ես կլինեմ, ուրիշը կլինի, դրանք տեխնիկական հարցեր են, բայց իշխանություն-ժողովուրդ հին հարաբերությունը չկա այլևս և չի լինելու այլևս։ Եվ այն, որ դպրոցականներն են մասնակցում այս պրոցեսին, դա երաշխիք է, որ ոչ թե 10-20 տարի այդպես չի լինելու, այլ 100 տարի այդպես չի լինելու, իսկ որ 100 տարի այդպես չեղավ, այդ ավանդույթը հավերժ շարունակվելու է։ Այսինքն՝ Հայաստանի ժողովրդավարական ապագային որևէ բան չի սպառնում, ես դրանում համոզված եմ։
«Ազատություն». - Այնուամենայնիվ, նորից անդրադառնանք արտահերթ խորհրդարանական ընտրություններին՝ եթե ՀՀԿ-ն անցկացնի այդ ընտրությունները, այս սցենարին պատրա՞ստ եք։
Փաշինյան. - Այո՛, մենք բոլոր սցենարներին պատրաստ ենք, և յուրաքանչյուր սցենարի դեպքում ունենք մեր գործողությունների ծրագիրը։
«Ազատություն». - Պատրա՞ստ եք Կենտրոնական ընտրական հանձնաժողովի նախագահ Տիգրան Մուկուչյանի կազմակերպած ընտրություններին։
Փաշինյան. - Դա կախված կլինի մթնոլորտից, որովհետև, եթե էս պրոցեսն էս ծավալով է ընթանում, մենք ամեն օր իրավիճակի փոփոխություն ենք ունենում։ Վերջին 15 օրվա ընթացքում հանրապետությունում քաղաքական վիճակն ամեն օր փոխվում է և շուտով կփոխվի ամեն ժամ, և դա կախված կլինի իրավիճակի վերլուծությունից։
«Ազատություն». – Հիմա Ձեր մարտավարությունը՝ մինչև մյուս ընտրություն մեծացնել ճնշումը, ճի՞շտ եմ հասկանում։
Փաշինյան. - Մինչև իշխանափոխություն մեծացնել ճնշումը։
«Ազատություն». - Պարոն Փաշինյան, Դուք գտա՞ք այն հարցի պատասխանը, թե որն է սկզբունքային խոչընդոտը, որ չեն ցանկանում զիջել իշխանությունը։
Նիկոլ Փաշինյան. - Գիտեք, իրենք ուղղակի օգտվում են առիթից։ Նրանք քանի որ միայն բիրտ ուժն են հասկանում, ուրիշ որևէ բան կա՛մ չեն հասկանում, կա՛մ դժվար են հասկանում, նրանք մտածում են, որ եթե սիրո և հանդուրժողականության հեղափոխություն է, ուրեմն օգտվենք էդ սիրուց և հանդուրժողականությունից, մի չորս օր ավել նստենք մեր աթոռներին, երկրորդ խնդիրը՝ ես համոզված եմ, որ նրանց պահվածքը սադրիչ է՝ նրանք ուզում են մարդկանց ջղայնացնել, հունից հանել, բայց դա նրանց մոտ չի ստացվելու։ Երեկ անընդհատ խոսում էին սրացումներից, բախումներից, ի՞նչ բախման մասին է խոսքը՝ ժողովրդի 95 տոկոսը շարժման աջակից է, ո՞վ ո՞ւմ հետ է բախվելու: Հիմա էլ խոսում են, թե էսինչը սադրիչ խումբ է ուղարկել, բախումներ են հրահրում, ոչ մի բախում ոչ ոք չի կարող հրահրի, ամբողջ իրավիճակը 100 տոկոսով գտնվում է մեր վերահսկողության տակ։ Կլինեն սադրիչներ՝ ես նորից ասում եմ՝ բռնությանը բռնությամբ չենք պատասխանելու։
Հետևեք մեզ Facebook-ում