Գագիկ Ծառուկյանը փորձում է բուֆերի դեր կատարել Սերժ Սարգսյանի ու հանրության միջև

Երեկվա ԱԺ-ում քվեարկությունը Սերժ Սարգսյանի վարչապետության շուրջ հետաքրքիր էր մի շարք տեսանկյուններից:
Կարճ ներկայացնենք խմբակցությունների դիրքորշման տրամաբանությունը:

Ի՞նչ  ցույց տվեց ՀՀԿ-ի խմբակցության քվեարկությունը 

Նախ այս քվեարկությունը ցույց տվեց, որ ՀՀԿ-ն այսօր կոնսոլիդացված է իր լիդերի շուրջ և այն տրոհված չէ, իսկ Կարեն Կարապետյանը ընդամենը բուտաֆորիայի դեր է կատարում: Հովիկ Աբրահամյանի հեռացումից հետո այստեղ տիրում է Սերժ Սարգսյանի միանձնյա դոմինանտությունը, ինչը նշանակում է, որ Սերժ Սարգսյանը այս կառույցը դիտարկում է որպես անձնական օգտագործման գործիք Հայաստանում հավերժ իշխելու համար, իսկ իր պատասխանատվությունը փորձելու է լղոզել՝ թաքնվելով ՀՀԿ-ի հետևում:

ՀՅԴ-ն վերջնականապես կորցրեց իր սեփական դիմագիծը

Այս քվեարկությունով ՀՅԴ-ն իրոք նոր էջ բացեց իր համար: Այլևս ոչ ոք չի հավատալու դաշնակցական հեքիաթներին, իբր «մարդակենտրոն» պառլամենտական կառավարման համակարգի լուսավոր ապագային, քանզի բոլորը հասկացան, որ սա ցինիկ խաբեություն էր նշանակում ՀՅԴ-ի կողմից՝ հանրությանը:

«Ելք»-ի դհոլական հատվածը բացահայտված է

Թեև Էդմոն Մարուքյանն ու Արամ Սարգսյանը Սերժ Սարգսյանի թեկնածությանը դեմ են քվեարկել, բոլորի համար էլ պարզ դարձավ նրանց ով լինելը: Պարզապես ի տարբերություն Գեղամյանի, նրանք ժամանակից շուտ «պայթեցին» և այսօր արդեն ոչ մեկին հետաքրքիր չեն: Իսկ իշխանությունը ավելորդ «դավեսկաներ» չի սիրում պահել, մանավանդ այս ֆինանսական ճգնաժամի պայմաններում:

Ամենա հետաքրքիրը «Ծառուկյան» դաշինքի դիրքորոշումն էր

Հաշվի առնելով ներկա իրավիճակը, Ծառուկյանը որոշեց ոչ ստանդարտ դիրքորոշումով հանդես գալ: Խմբակցության 12 անդամներ դեմ քվեարկեցին Սերժ Սարգսյանին, 12 կողմ, իսկ մնացածները Ծառուկյանի հետ միասին գերադասեցին չմասնակցել քվեարկությանը: Իր այս որոշումով Ծառուկյանը փորձում է յուրօրինակ բուֆերի դեր կատարել Սերժ Սարգսյանի ու հանրության միջև:
Անշուշտ, դասական մոտեցման տեսանկյունից այս մոտեցումը կարող է անհասկանալի լինել, սակայն բոլորս էլ հասկանում ենք, որ գտնվում ենք ոչ դասական վիճակում, որտեղ քաղաքական դաշտը իսպառ ոչնչացված է, և այս իրավիճակում երևի թե ստանդարտ մոտեցումներով հնարավոր չէ դուրս գալ այս իրավիճակից:
Ինչևիցե, արձանագրենք, որ Ծառուկյանի քաղաքական դիրքորոշումը հուսադրող է այս իրավիճակի տեսանկյունից, և նա կարող է լուրջ դեր կատարել իրավիճակի փոփոխության դեպքում: Այս ամենի մասին կանրադառնանք հետագայում:

Արտակ Հակոբյան