Live. Նիկոլ Փաշինյան. «Ամեն ինչ պետք է անենք, որ ԱԺ նիստ տեղի չունենա» (լրացվում է, տեսանյութ)

Նիկոլ Փաշինյանն ուզում է գնալ իր գործի տեղը

«Ելք» խմբակցության ղեկավար Նիկոլ Փաշինյանը հայտարարեց, որ այս պահին փակ են Բաղրամյան պողոտան, Արշակունյաց պողոտան, Ազատության պողոտան, Ամիրյան փողոցը։ Երթեւեկությունը կաթվածահար է։ Նա նշեց, որ իրենց նպատակը ԱԺ շենք հասնելը։ «Էլ չեմ ասում, որ գործիս տեղն է»,- ասաց նա։ Այս պահին ոստիկանական պատնեշ է Սահմանադրական դատարանի մոտ։ «Մենք ամեն ինչ պետք է անենք, որ ԱԺ հատուկ նիստ տեղի չունենա»,- նշեց նա։ Հիշեցնենք, որ վաղը նախատեսվում է ԱԺ հատուկ նիստում Սերժ Սարգսյանին ընտրել վարչապետ,որը կունենա ավելի շատ լիազորություններ, քան Նախագահը։

Թող 400 հոգու բերման ենթարկեն

Դասադուլ հայտարարած ուսանողները շարժվում են դեպի Աբովյան պուրակ։ Նրանք կանգնեցնում են մեքենաները՝ առաջարկելով միանալ իրենց։ Երթեւեկությունը կաթվածահար է։ Անընդհատ վիճաբանություն է տեղի ունենում ուսանողների եւ վարորդների միջեւ։ Ուսանողները աղբարկղերով փակում են ճանապարհը։ Քաղաքացիները կակաչներ են նվիրում ոստիկաններին՝ առաջարկելով միանալ իրենց։

«Մեզ միանո՞ւմ եք»,- դիմում են ոստիկաններին ուսանողները՝ երբ նրանք առաջարկում են բացել ճանապարհը։ Ըստ ուսանողների՝ իրենք իրականացնում են իրենց սահմանադրական իրավունքը. եւ եթե խախտում են արել, թող 400 հոգուն բերման ենթարկեն։

Ոստիկանները ստիպում են վարորդներին լքել տարածքը, նույնիսկ երբ ուսանողները կանգնած են մեքենայի դիմացը։

Ուսանողներին միացել է դերասան Հայկ Մարությանը՝ Կարգին Հայկոն։

Ակցիան տեղափոխվում է Բաղրամյան պողոտա

Բաղրամյան պողոտայում, Սահմանադրական դատարանի մոտ ոստիկաններն արգելապատնեշներ են տեղադրել` փակելով փողոցը և ցուցարարներին թույլ չտալով բարձրանալ Բաղրամյանով դեպի վեր։

Մինչ այդ, սակայն, «Ելք» խմբակցության ղեկավար, «Իմ քայլը» նախաձեռնության հեղինակ Նիկոլ Փաշինյանը, Բաղրամյան պողոտայով վազելով, փորձում էր հասնել ավելի վերին հատվածներին` ակցիայի մասնակիցներին կոչ անելով հետևել իրեն։

Այս պահին ցուցարարները փակել են Բաղրամյան պողոտան, Մոսկովյան և Աբովյան փողոցները։

11:05 Վանկարկելով «Քայլ արա՝ մերժիր Սերժին» և «Միացում» ցուցարարները Նալբանդյան փողոցով շարժվում են դեպի Վադանանց փողոց:

11:14 Ցուցարարներն այս պահին գտնվում են Խանջյան փողոցում, որը նույնպես արգելափակված է: Նիկոլ Փաշինյանը կոչ է անում քաղաքացիներին միանալ ցուցարարներին:

11:52 Ցուցարարները գտնվում են Երևանի Խաչատուր Աբովյանի անվան հայկական պետական մանկավարժական համալսարանի ներսում: Նիկոլ Փաշինյանը ցուցարարների հետ կոչ է անում բուհի ուսանողներին դասադուլ անել և միանալ իրենց:

13:34 Այս պահին քաղաքացիական հասարակության ներկայացուցիչները, որոնք դեմ են Սերժ Սարգսյանի վերարտադրությանը երկրի առաջին դեմքի՝ վարչապետի պաշտնում, գտնվում են Բաղրամյան պողոտայի սկզբնամասում: Հիշեցնենք, որ Բաղրամյան պողոտան փակել են ոստիկանները: