Ստամբուլում Իրանի քաղաքացիներ են ձերբակալվել

Ստամբուլի ոստիկանության կազմակերպված հանցավորության դեմ պայքարի վարչության աշխատակիցներն այս առավոտ ձերբակալել են թմրանյութերի անօրինական առքուվաճառքով զբաղվող հանցավոր խմբավորման իրանցի պարագլուխ Նաջի Շերիֆի Զինդաշտիին ու նրա խմբավորման 9 անդամի, որոնք նույնպես Իրանի քաղաքացիներ են։

Ինչպես փոխանցում է թուրքական IHA գործակալությունը, ոստիկանների հատուկ գործողությունը դեռևս ընթացքի մեջ է գտնվում, և չեն բացառվում նոր զանգվածային ձերբակալություններ:

Հայտնի է, որ Նաջի Շերիֆի Զինդաշտին Թուրքիայում արդեն մեկ անգամ դատապարտվել է թմրանյութերի անօրինական առքուվաճառքի համար և ազատազրկվել՝ կրելով սահմանված պատիժը:

Հետաքրքրական է, որ ըստ թուրքական լրատվամիջոցների՝ հանցավոր խմբավորման իրանցի պարագլուխը թուրքական հատուկ ծառայությունների կողմից կասկածվում է նաև ԱՄՆ-ում գյուլենականների (Թուրքիայում տեղի ունեցած հեղաշրջման փորձի կազմակերպման համար մեղադրվող թուրք կրոնական քարոզիչ Ֆեթուլլահ Գյուլենի թիմակիցները - tert.am) հետ ունեցած կապերի համար:

Աղբյուրը՝  Tert.am