Ի՞նչ հետևանքներ կարող է ունենալ ռուս-թուրքական մերձեցումը Հայաստանի համար. Տեսանյութ

Գրեթե բոլոր միջազգային վերլուծաբանները նկատեցին, որ Պուտինը իր վերընտրվելուց հետո իր առաջին պաշտոնական այցը կատարեց ոչ թե Բելառուս կամ Ղազախստան, այլ հենց Թուրքիա: Դրանով իսկ ցույց տալով իր առանձնահատուկ վերաբերմունքը այդ երկրի հանդեպ:Դա ցույց է տալիս Մոսկվայի ու Անկարայի ներկայիս  հարաբերությունների ռազմավարական բնույթը: 2015-ի հայտնի ճգնաժամը արդեն անցյալում է գտնվում, և երկու երկրները իրենց փոխհարաբերություններում փորձում են այլևս անցյալին չվերադառնալ: 

Ո՞րն է Մոսկվայի ու Անկարայի հարաբերությունների ներկայիս ջերմացման պատճառը

Արևմտյան դիտորդների կարծիքով ռուս-թուրքական հարաբերությունների աննախադեպ ջերմացման այս փուլը հիշեցնում է Լենին-Աթաթուրք հարաբերությունների պատմությունը: Այն ժամանակ «Անտանտան» պայքարում էր միաժամանակ և քեմալական Թուրքիայի,և բոլշևիկյան Ռուսաստանի հետ: Այսօր էլ նույն Արևմուտքը հակամարտության մեջ է գտնվում, թե պուտինյան Ռուսաստանի, և թե էրդողանյան Թուրքիայի հետ: Հենց այս իրավիճակն էլ գլխավորապես նպաստել է Մոսկվայի ու Անկարայի աննախադեպ մերձեցմանը: Կրկին հիշել են, որ երկու երկրների
առևտրաշրջանառությունը պետք է հասցնել 100 մլրդ դոլարի: Եթե հաշվի առնենք C-400-ի վաճառքի որոշումը, 4 մլն ռուս զբոսաշրջիկների առկայությունը, նոր գերհզոր
ատոմակայանի կառուցումը և ամենակարևորը՝ «թուրքական հոսքի» կառուցումը, ապա կարող ենք արձանագրել, որ 100 մլրդ-ը կարող է և սարերի հետևում չլինել:

Ինչպես այս հարաբերությունները կարող են ազդել Հայաստանի վրա

Նախ պետք է նշել, որ այս հարաբերությունները փաստ են, անկախ մեր ցանկությունից: Եվ ուրեմն այս իրողությունը հաշվի առնելով պետք է վերլուծենք մեր հետագա քայլերը:
Եթե հայաստանյան իշխող վերնախավը իրոք շարունակի դիտորդի կարգավիճակում մնալ, ապա ինչ խոսք, վաղ թե ուշ մենք կարող ենք դառնալ «մանրադրամ» այս
հարաբերություններում, ինչպես որ դարձանք 100 տարի առաջ: Սակայն եթե մենք այս իրողությունից ճիշտ հետևություններ անենք, ապա կարող ենք ոչ միայն խուսափել վտանգներից, այլ նաև նոր ձեռքբերումներ ունենանլ: Ընդորում, սա ոչ միայն մեր կարծիքն է, այլ նաև այդպես են մտածում նաև որոշ մոսկովյան ազդեցիկ աղբյուրներ, որոնք ունեն նաև Կրեմլի որոշումների վրա որոշակի ազդեցություն:

Իսկ այս ամենի մասին կներկայացնենք մեր հաջորդ հոդվածում:

Հակոբ Կարապետյան