Ռուսաստանն արտաքսում է մի շարք երկրների դիվանագետներին

Ռուսաստանն արտաքսում է մի շարք երկրների դիվանագետներին՝ ի պատասխան «Սկրիպալի գործով» ռուս դիվանագետների արտաքսման, հայտնում է «ՌԻԱ Նովոստի» գործակալությունը։

Հաղորդվում է, որ այս քայլը հայելային բնույթ է կրում։ Այսպես՝ Ռուսաստանը պետք է լքեն 4 լեհ, 3 լիտվացի, 1 լատվիացի, 2 իտալացի դիվանագետ։

Նաև արտաքսվում են Նիդեռլանդների դիվանագիտական ներկայացուցչության 2 աշխատակից և էստոնացի ռազմական կցորդ Տոոմաս Պեդան։ Նրանք բոլորը պետք է լքեն երկիրը մինչև ապրիլի 7-ը։

ՌԴ ԱԳՆ-ն Լոնդոնից պահանջել է նաև հավասարեցնել Ռուսաստանում իր դիվանագիտական ներկայացուցչությունների աշխատակիցների ընդհանուր թիվը Մեծ Բրիտանիայում ռուսական դիվանագիտական առաքելությունների աշխատակիցների թվին, դրա համար Լոնդոնին հատկացվել է 1 ամիս։

«Սա ափսոսանք է առաջացնում, սակայն Ռուսաստանի նախկին քայլերից ելնելով՝ մենք ակնկալում էինք նման պատասխան»,- «ՌԻԱ Նովոստի» գործակալությանն ասել է Մեծ Բրիտանիայի ԱԳՆ ներկայացուցիչը։

Ավելի վաղ հաղորդվել էր, որ ՌԴ-ում Լիտվայի դեսպանն ու Մոլդովայի դեսպանատան ներկայացուցիչն այցելել են ՌԴ արտաքին գործերի նախարարություն։ Դրանից առաջ հայտնի է դարձել Ուկրաինայի դեսպանության ներկայացուցչի ժամանման մասին։ Ավելի ուշ ԱԳՆ շենքին է մոտեցել Չեխիայի դեսպանատան ներկայացուցչին տեղափոխող մեքենան։

Մինչ այդ, ԱԳՆ են այցելել Մեծ Բրիտանիայի, Ֆրանսիայի, Գերմանիայի, Ալբանիայի, Իտալիայի դեսպանները, ինչպես նաև Ռումինիայի և Նիդեռլանդների դիվանագիտական առաքելությունների ղեկավարները։

Ավելի վաղ ՌԴ ԱԳՆ-ն հայտնել էր մի շարք երկրների դեսպաններին նախարարություն կանչելու մասին։ Նշվել է, որ կանչվել են այն երկրների ներկայացուցիչները, որոնք «Սկրիպալի գործով» ոչ բարեկամական քայլ են կատարել Ռուսաստանի նկատմամբ, նրանց կհանձնվեն բողոքի նոտաներ։

Հիշեցնենք, որ 66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։

Մեծ Բրիտանիան հայտարարել է, որ հարձակման պատասխանատուն, անկասկած, Մոսկվան է: Մինչդեռ ՌԴ նախագահի մամուլի քարտուղար Դմիտրի Պեսկովը հայտարարել էր, որ Սոլսբերի քաղաքում ռուսական հետախուզական վարչության նախկին աշխատակից Սերգեյ Սկրիպալի և նրա դստեր թունավորմանը Ռուսաստանի ներգրավվածության առնչությամբ ադեկվատ և խելամիտ ապացույցներ Մոսկվային չեն ներկայացվել:

Հիշեցնենք, որ Մեծ Բրիտանիայի վարչապետ Թերեզա Մեյը հայտարարել էր 23 ռուս դիվանագետի արտաքսելու մասին՝ ռուս նախկին լրտեսի ու նրա դստեր թունավորման առնչությամբ:

Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում:

Tert.am