WikiLeaks- ի հիմնադիր Ջուլիան Ասանժին զրկել են արտաքին աշխարհի հետ կապի միջոցներից

Էկվադորի կառավարությունը զրկել է WikiLeaks- ի հիմնադիր Ջուլիան Ասանժին՝ արտաքին աշխարհի հետ կապի միջոցներից: Այս մասին նշվում է երկրի իշխանությունների հաղորդագրությունում, հաղորդում է «РИА НОВОСТИ»-ն:

«Այս միջոցը ձեռնարկվել է Ասանժի կողմից 2017 թվականի վերջին կառավարությանը տրված գրավոր պարտավորությանը չհետեւելու կապակցությամբ, որում նա խոստացել էր չհրապարակել այնպիսի հաղորդագրություններ, որոնք ենթադրում են միջամտություն՝ այլ պետությունների հարաբերություններին», - ասվում է Էկվադորի կառավարության հայտարարության մեջ: Միեւնույն ժամանակ, չի նշվում, թե Ասանժի որ հաղորդագրությունն է խախտել պարտավորությունը:

Էկվադորի իշխանությունների կարծիքով՝ Ասանժի վարքագիծն ու հաղորդումները սոցիալական ցանցերում վտանգում են Մեծ Բրիտանիայի, Եվրամիության երկրների եւ աշխարհի այլ պետությունների հետ բարիդրացիական հարաբերությունները: Այդ կապակցությամբ Ասանժի հաղորդակցության միջոցները երեքշաբթի անջատվել են: Ընդ որում նրա վարքագծի կապակցությամբ լրացուցիչ միջոցները չեն բացառվում:

Վերջերս Ասանժն իր Twitter-ում բազմաթիվ հաղորդագրություններ էր հրապարակել՝ կապված կատալոնական քաղաքական գործիչ Կառլես Պուչդեմոնի ձերբակալության հետ: Նրանցից մեկում Կատալոնիայի կառավարության նախկին ղեկավարին նա «Գերմանիայի առաջին քաղբանտարկյալ» էր անվանել՝ հղում կատարելով գերմանական թերթի հոդվածին:

Հիշեցնենք, որ 2010 թվականին Շվեդիայի դատարանը Ասանժին մեղադրեց բռնաբարության մեջ , 2017-ի մայիսին գործը փակվեց: Ասանժը 2012 թվականից ապրում է Լոնդոնում Էկվադորի դեսպանատանը, նա դիմել է այս երկրի իշխանություններին քաղաքական ապաստան ստանալու համար, WikiLeaks- ի իր գործունեության հետ կապված՝ ԱՄՆ-ի հանձնման վախի պատճառով: Այս տարվա հունվարին հայտնի դարձավ, որ Էկվադորը բավարարել է Ասանժի խնդրանքը՝ Էկվադորի քաղաքացիություն ունենալու համար: