Աշոտ Աղաբաբյանի վերջին հույսը Սերժ Սարգսյա՞նն է

Երբեմնի ՀՀԿ-ական կարկառուն գործիչ Աշոտ Աղաբաբյանը հետաքրքիր մտքերով է կիսվել լրատվամիջոցներից մեկի հետ: Այն հարցին, թե նա այսօր ՀՀԿ-ական է, թե նրան հեռացրել են կուսակցությունից, խուսափողական պատասխան է տալիս, նշելով թե չգիտի դրա մասին: Բայց ավելի հետաքրքիր են նրա մյուս մտքերը: Աղաբաբյանը նշում է, որ այսօր զբաղվում է բիզնեսով, և այդ ճանապարհին նա շատ դժվարությունների հետ է հանդիպում: Լրագրողի այն հարցին, թե կարող է նրան խանգարում է հարազատ կուսակցությունը, նշում է, թե ոչ թե կուսակցությունն է խանգարում, այլ անկատար օրենքները: Եվ նա հույս ունի, որ ապագա վարչապետը կփոխի այդ իրավիճակը:

Իսկ հիմա փորձենք հասկանալ թե ինչ է ասում պարոն Աղաբաբյանը: Պարզվում է, այսօր բիզնեսին խանգարում է ոչ թե ՀՀԿ-ն, այլ՝ անկատար օրենքները: Այստեղից հետևում է՝  կամ ԱԺ-ում ՀՀԿ-ն կազմում է փոքրամասնություն և չի կարողանում փոխել օրենսդրական դաշտը որպեսզի Աղաբաբյանի բիզնեսը զարգանա, կամ՝ ԱԺ-ն կառավարում են … այլմոլորակայինները, կամ էլ՝ ԱԺ-ում նստած են «վատ» ՀՀԿ-ականները և նա հույս ունի, որ ապագա վարչապետը կփոխի այս իրավիճակը: Նույն հարցազրույցում նա նշում է, թե ում է տեսնում վարչապետի պաշտոնում, և դա Սերժ Սարգսյանն է, և նա է մնացել Աղաբաբյանի վերջին հույսը:

Փաստորեն ստացվում է՝ Սերժ Սարգսյանը «անտեղյակ է» «վատ» ՀՀԿ-ականների գործողություններից և հույս ունի ապրիլից հետո տեսնել «արդար» վարչապետ, որ կազդի «վատ» ՀՀԿ-ականների վրա, և երկիրը վերջապես կզարգանա:

Կրկնենք, որ սա ասում է ոչ թե շարքային քաղաքացին, այլ՝ ՀՀԿ-ական վերնախավի նախկին ազդեցիկ դեմքերից մեկը:

Եվ այս ամենից հետո դուք ուզում էք որ Հայաստանը կարողանա լուծել իր խնդիրները, Ղարաբաղյան հարցը արդար հանգուցալուծվի՞:

Կարծում ենք, որ այս հարցադրումների պատասխանը պետք է հուզի բոլոր նրանց, ովքեր դեռ որոշել են մնալ և ապրել Հայաստանում:

Դավիթ Մկրտչյան