Ինչո՞ւ ՀՀԿ-ն մերժեց իր կոալիցիոն գործընկեր ՀՅԴ-ի առաջարկը

ՀՀԿ-ն հերթական անգամ մերժեց իր կոալիցիոն գործընկեր ՀՅԴ-ի առաջարկը տնտեսական մրցակցության պաշտպանության մասին օրինագծում փոփոխություն մտցնելու վերաբերյալ, որի համաձայն այդ հանձնաժողովի 7 անդամներից մեկը անպայման լինի ընդդիմության ներկայացուցիչ: Մերժման պատճառաբանությունն այն է, թե իբր չի կարելի հանձնաժողովի «ապաքաղաքական» աշխատանքը «քաղաքականացնել»: Հիմնավորումն այնքան ցինիկ է հնչում , որ քննադատությանը չի դիմանում: Նման հիմնավորման համար գոնե ֆորմալ այդ հանձնաժողովի անդամները չպետք է լինեին կուսակցական: Մինջդեռ այդ հանձնաժողովի նախագահը՝ Արտակ Շաբոյանը, ոչ միայն շարքային ՀՀԿ-ական է, այլև այդ կուսակցության խորհրդի անդամ է:

Առաջին հայացքից այս աննշան խնդիրը լուրջ մտորելու տեղիք է տալիս այն մասին, թե ինչ կարող է սպասվել Հայաստանին մոտ ժամանակներս:

Ինչո՞ւ ՀՀԿ-ն չի գնում նույնիսկ աննշան զիջումների

Նշենք, որ թեև ՀՅԴ-ն ՀՀԿ-ի գործընկերն է, այնուամենայնիվ ՀՀԿ-ն դաշնակցականներին չի վստահվում որևէ ծանրակշիռ պաշտոն, լինի դա ԱԱԾ, Ներքին գործեր, պաշտպանության նախարար, և նույնիսկ արտգործ նախարարություն: Շատերը կնշեն թե ՀՀԿ-ն բացարձակ մեծամասնություն ունի, ինո՞ւ պետք է վստահի լուրջ պաշտոն իր գործընկերոջը: Այդ դեպքում հարց կառաջանա՝ այդ դեպքում որ՞ն է այդպիսի կոալիցիայի իմաստը: Եվրոպական երկրներում, որտեղ ձևավորվում են կոալիցիաները, «փոքր» գործնկերները անպայման ստանում են առանցքային պաշտոններ՝ արտգործնախարարի կամ նԳՆ-ի և այլն: Եվ այստեղ ստացած ձայների տոկոսները դառնում են երկրորդական: Խորհուրդ կտանք ՀՀԿ-ականներին ուսումնասիրել օրինակ Գերմանիայի օրինակը:

Սակայն մեզ համար հասկանալի է ՀՀԿ-ականների ցինիկ պահվածքը: Նրանք գործընկերային տրամաբանության մեջ չեն գործում: Եվ եթե չեն վստահում իրենց գործընկերներին, ապա ինչպե՞ս կարող են վստահել խորհրդարանական ընդդիմությանը:

Եթե նույնիսկ Շաբոյանի հանձնաժողովում նրանք պատրաստ չեն տեսնել ընդդիմության ընդամենը մեկ ներկայացուցիչ, ապա էլ ինչի՞ մասին է խոսքը:

Միթե պարզ չէ, որ ՀՀԿ-ն որևէ զիջման չի գնա նաև Ընտրական օրենսգրքի շուրջ: Իսկ սա նշանակում է , որ իշխող վերնախավը պատրաստ չէ երկխոսությանը հանրության հետ: Քաղաքական դաշտը այսօր փոշիացած է, և ուրեմն նշանակում է, որ կարճ ժամանակահատվածում բոլորը կհասկանան, որ ՀՀԿ-ի հետ հարաբերվելու միակ հնարավորությունը կունենան Սեֆիլյանը և իր կողմնակիցները: Դրան է ցավոք տանում ՀՀԿ-ական գործելավոճի տրամաբանությունը:

Արտակ Հակոբյան