Այսօր Կեմերովոյում կհուղարկավորեն խոշոր հրդեհի 14 զոհի

Մարտի 28-ին  Կեմերովո քաղաքում տեղի կունենա մարտի 25-ի ողբերգական հրդեհի զոհերի մի մասի հուղարկավորման արարողությունը:

Այդ մասին հայտնում է  Ria.ru-ն:

Ինչպես նշվում է, հրաժեշտի արարողություններն արդեն սկսվել են: Դրանք անցկացվում են տարբեր վայրերում՝ այդ թվում նաև եկեղեցիներում:

Կեմերովոյում սկսվել են ոգեկոչման բազմաթիվ ակցիաներ:

Հիշեցնենք, որ ՌԴ նախագահ Վլադիմիր Պուտինը, անդրադառնալով մարտի 25-ին Կեմերովո քաղաքի առևտրի կենտրոններից մեկում տեղի ունեցած ողբերգական դեպքին, նշել է, որ զոհված երեխաների թվի մասին մտածելիս ուզում է ոչ թե լացել, այլ բարձր հեկեկալ:

«Երբ խոսում են զոհված երեխաների թվի մասին, առաջին զգացողությունը, որ ունենում եմ՝ ոչ թե լացելու, այլ բարձր հեկեկալու ցանկությունն է»,-ասել է նախագահը:

Պուտինն ասել է, որ կատարվածի պատճառը «հանցավոր անփութությունն» է ու «թափթփվածությունը»:

«Մարդիկ, երեխաները եկել էին հանգստանալու: Մենք խոսում ենք ժողովրդագրության մասին, բայց այսքան երեխա ենք կորցրել՝ ինչի՞ պատճառով. հանցավոր անփութության, թափթփվածության»,-ասել է Պուտինը: