Վարչապետը ՊԵԿ-ից հարկատուների ցանկ պահանջեց. այսօր՝ Կառավարության նիստում (ՏԵՍԱՆՅՈՒԹ, ՖՈՏՈՇԱՐՔ)
Կառավարության այսօրվա նիստում վարչապետ Կարեն Կարապետյանը Կառավարության աշխատակազմի ղեկավար-նախարար Դավիթ Հարությունյանին նախ խնդրեց ներկայացնել Կառավարության նախորդ տարվա հանձնարարականներն ու դրանց կատարողականները, ապա ներկայացրեց հերթական հանձնարարականները:
Վարչապետի առաջին հանձնարարականը վերաբերում էր ներդրումային ծրագրերի գույքագրմանը. «Հաջորդ շաբաթ բոլոր գերատեսչությունները, կոմիտեները հանրությանը պետք է հաշժվետվություն տան 2017 թ-ին իրենց ոլորտում ինչ ներդրումներ են ակնկալվում: Ներդրումների աղբյուրը կարող է լինել տարբեր՝ վարկային, բյուջե և այլն»,-մանրամասնեց վարչապետը՝ հավելելով, որ այդ կանխատեսումների հիման վրա կառավարությունը պետք է ամփոփի, թե ընդհանուր ինչ ներդրումային ծրագիր է ստանալու:
Կարեն Կարապետյանի հաջորդ հանձնարարականը ուղղված էր Կրթության նախարարությանը: Ըստ դրա, ԿԳ նախարար Լևոն Մկրտչյանը մեկամսյա ժամկետում կառավարությանը պետք է ներկայացնի դպրոցներում օտար լեզուների ուսուցման ավելի խորացված՝ նոր ծրագիր:
Պետական եկամուտների կոմիտեին հանձնարարվեց մշտապես ներկայացնել կարգապահ ու խախտումներ թույլ տված հարկատուների ցանկ, որպեսզի սխալ ընկալումներ այլևս չլինեն:
Ըստ վարչապետի, խնդիրն այն է, որ ՓՄՁ սուբյեկտների վերաբերյալ նախկինում հնչեցրած իր հայտարարությունը սխալ է ընկալվել. «ՊԵԿ-ն այսօր ահազանգում է, որ մեծաթիվ հարկ վճարող սուբյեկտներ ոչ համարժեք են ընկալել ու մեկնաբանել այդ հանձնարարականը: Մասնավորապես առկա են հետևյալ բացասական երևույթները՝ իրացման շրջանառության, գների, աշխատողների թվաքանակի թերհայտարարագրում, ապրանքների մատակարարում՝ առանց հաշվարկային փաստաթղթերի, ծախսերի ուռճացված թվերի ներկայացում, ՀԴՄ-ների շահագործման կանոնների խախտում: Հարկ եմ համարում պարզաբանել, որ, այսպես կոչված, մեղմ վարչարարությունը կարող է եւ պետք է վերաբերի բացառապես օրինապահ հարկ վճարողներին, եւ հարկերից խուսափելու ցանկացած դրսեւորում, անկախ հարկ վճարողի բնույթից, պետք է կանխվի»,- ասաց վարչապետը՝ ընդգծելով, որ այն հարկատուները, որոնք ՊԵԿ-ին առցանց հասանելի կդարձնեն իրենց հաշվապահական տվյալները եւ կամավոր կուղղեն ՊԵԿ-ի կողմից արձանագրած խախտումները, ապա տարեկան ստուգումների ծրագրում չեն ներառվի:
Մանրամասները՝ կից տեսանյութում և ֆոտոշարքով:
Հետևեք մեզ Facebook-ում