Մինչև երեսուն տարեկանը չեմ եղել դատարանում ու ոստիկանությունում, հենց ամուսնացա դարձա ամբաստանյալ. Վլադիկ Մարտիրոսյան

Շենգավիթ վարչական շրջանի տարածքում ընտանեկան աղմկահարույց դրամայի՝ սպանության, գործից առանձին քննվող ծեծի ու սպանության սպառնալիքների գործով վաղը կհրապարակվի դատավճիռը: Իսկ այսօրվա դատական նիստում ավարտվեցին պաշտպանական ճառերն, երկու կողմերի ռեպլիկները, ամբաստանյալներից մեկը՝ Վլադիկ Մարտիրոսյանը, հանդես եկավ հակիրճ վերջին խոսքով՝ խնդրելով կայացնել արդարացման դատավճիռ:

Ամբաստանյալները նախկին ամուսիններ են՝ Վլադիկ Մարտիրոսյանն ու Թագուհի Մանսուրյանը, գործով տուժող է ճանաչված վերջինիս հայրը՝ Վաչագան Մանսուրյանը:

Ամբաստանյալ Վլադիկ Մարտիրոսյանի պաշտպան Լիաննա Գասպարյանն իր պաշտպանական ճառում այսօր նշեց, որ թեև իր պաշտպանյալի դեմ առաջադրվել է մեղադրանք՝ ծեծի ու սպանության սպառնալիք տալու 4-ական դրվագով, սակայն գործում չկա մեղադրանքն ապացուցող գեթ մեկ ապացույց: Պաշտպանը միջնորդեց արդարացնել իր պաշտպանյալին՝ հանցակազմի բացակայության հիմքով:

Պաշտպան Գասպարյանը դատարանի ուշադրությունը հրավիրեց գործով մեղադրողի հայտարարության վրա, ով միջնորդել էր վերացնել նախորդ՝ վեց ամսվա ազատազրկման պատիժը պայմանականորեն չկիրառելու դրույթի գործողությունը, միջնորդելով նշանակել պատիժ երկու տարվա ազատազրկման ու 200 հազար դրամի տուգանքի ձևով: Մինչդեռ, ըստ պաշտպանի, իր պաշտպանյալը այդ գործով չի գտնվել փորձաշրջանում, ուստի և չի կարող այն վերացվել: Ի դեպ, մեղադրողն էլ իր ռեպլիկում ընդունեց, որ հետագայում պարզվել է պաշտպանի նշած հանգամանքը:

Ամբաստանյալ Վ.Մարտիրոսյանը միացավ իր պաշտպանի ճառին՝ նշելով, որ պաշտպանը ճիշտ ներկայացրեց իրականությունը:

Ամբաստանյալն իր հերթին նշեց, որ ինքը 2014թ. փետրվարին ամուսնացել է Թագուհի Մանսուրյանի հետ, իրենց ընտանիքը կնոջ ծնողների պատճառով հայտնվել է լարված իրավիճակների մեջ, «ամեն կերպ փորձել են մեր ընտանեկան անդորրը խախտել»: Նա հայտարարեց, որ «ոչ մի բանի վրա աչք չեմ ունեցել, իմ կյանքիս նպատակն իմ երեխան է»:

Ըստ նրա, իր սխալն այն է եղել, որ ամուսնացել ու երեխա է ունեցել այդ կնոջից: «Մեղքի մեծ մասն այս կնոջ խղճին է»,- ասաց նա՝ ի նկատի ունենալով նախկին կնոջը: Նա հավելեց, որ «այս ամեն ինչի մեղքն օրենքինն է, օրենքի բացակայությանը, օրենքը չի գործում»:

Ըստ Վ.Մարտիրոսյանի, մասնավորապես, որպես սպանության սպառնալիք գնահատվող իր արտահայտությունն ընդամենը իր նախկին աներոջ ասածի պատասխանն է, այդ դեպքում նրան էլ պետք է մեղադրանք առաջադրվեր, «հետո էլ՝ ինձ»:

Ըստ ամբաստանյալի, մինչև երեսուն տարեկանն ինքը չի եղել դատարանում ու ոստիկանությունում, հենց ամուսնացավ Թագուհու հետ, դարձավ ամբաստանյալ:

Թագուհի Մանսուրյանն իր հերթին հակադարձեց, որ նախկին ամուսինը չի հետաքրքվել երեխայով, հարցեր չի տվել նրա հետ կապված: Նախկին կնոջ դիտարկումներին հետևեց նախկին ամուսնու դիտարկումը՝ երեխայի մասին չեն հարցնում, երեխային տեսնում են:

Եթե նախկինում ինքն այլ կարծիքի է եղել, ապա հիմա գտնում է, որ Թագուհին պետք է ենթարկվի պատասխանատվության այն ամենի համար, ինչ որ ինքն արել է, որպեսզի հասկանա, թե ինչ է արել, ասաց Վ.Մարտիրոսյանը:

Հիշեցնենք, որ նախորդ դատական նիստում պաշտպանական ճառերով հանդես էին եկել երեք դրվագ ծեծի հոդվածով մեղադրվող Թագուհի Մանսուրյանն ու նրա պաշտպան Անժելա Հոբոսյանը: Վերջինս նույնպես միջնորդել էր ճանաչել ու հռչակել իր պաշտպանյալի անմեղությունը:

Թագուհի Մանսուրյանն էլ նշել էր, որ ինքն ամեն կերպ փորձել է իր ընտանիքը պահպանել, սակայն նորից ու նորից ամուսինը բռնել է բռնությունների ուղին: Ամբաստանյալը հայտարարել էր, որ իրեն մեղսագրվող ծեծի երեք դրվագներով էլ ինքը նախահարձակ չի եղել, ամուսինն է միշտ հարձակվել իր վրա:

Աղբյուր` Փաստինֆո