Քաղաքացիական նախաձեռնությունը կոչ է անում արգելել «Չումբո»-ի մուտքը կրթական հաստատություններ

Անցյալ տարվա մայիսին մանկապատանեկան դիսկոտեկներ կազմակերպած և մասնագետների քննադատությանն արժանացած «Չումբո» նախաձեռնող խումբը օրերս հայտարարեց, որ հանդիպել է Կրթության նախարարին և փոխնախարարին և «երկու ժամ տևած ջերմ զրույցի ավարտին որոշվել է Հայաստանի բոլոր հիմնական և ավագ դպրոցների, բուհերի և այլ կրթական հաստատությունների միջոցառումների կազմակերպումը վստահել «Չումբո»-ին»։

Նախաձեռնության ֆեյսբուքյան էջը լուրը հայտնելուց բացի, նաև տեսանյութ է հրապարակել այդ հանդիպումից, որտեղ Կրթության նախարար Լևոն Մկրչտյանը ծրագրի մասին դրական է արտահայտվում․ - «Ինքը լավ ծրագիր ա: Ուրեմն մենք պետք է նախ հասկանանք ում հետ գործ ունենք՝ ինստիտուցիոնալ իմաստով, ովքե՞ր են․․․ հիմնադրամ են ստեղծում․․․»

«Չումբո» նախաձեռնող խմբի ղեկավարը նախարարի հետ քննարկմանն անգամ հանդիմանում է կրթության պատասխանատուներին, այդ թվում Երևանի քաղաքապետարանի ներկայացուցիչներին՝ պնդելով, որ առանց աջակցության 850 միլիոն դրամի ներդրում են անել երեխաների ժամանցի համար․ - «Մենք պետության կողմից ի՞նչ աջակցություն ունենք․․․ Ոչ մեկ չեն ասում՝ այ երիտասարդներ ջան, սենց հսկա բան եք անում, էկեք մի բանով քյոմագ անենք ձեզ․․․ Ավելին ասեմ՝ 850 միլիոն դրամ ա դրվել էդ ծրագրի մեջ, մեկը տասը դրամ չի տվել, ոչ էլ քաղաքապետարանը»:

Անցյալ տարի «Ազատությունը» հետևել է խմբի գործունեությանը, ներկա է եղել Երևանի ավելի քան 10 դպրոցների 1-10 դասարանների աշակերտների համար միաժամանակ կազմակերպված խրախճանքին կամ դիսկոտեկին։ Տոթ և պատշաճ օդափոխություն չունեցող սրահում դասերից հետո հարյուրավոր քաղցած երեխաների վաճառվում էր ջուր, չիպսեր, տորթեր: Բացի այդ, դպրոցականներին փարթիի տարածք էին բերել քաղաքապետարանի հատկացրած տրասպորտով, դահլիճը ևս հատկացվել էր անհատույց։

Հետևաբար ընդհանուր առմամբ, հայտնի չէ, թե ինչ 850 միլիոն ներդման մասին էր նախարարին հայտնում Սմբատ Հակոբյանը, ով պնդում էր, որ «հայանպաստ գործ են անում»։ Այսօր վերջինիս հետ կապ հաստատել չհաջողվեց։

Կրթության ոլորտի կազմակերպությունների և անձանց միավորող «Կրթական քաղաքացիական նախաձեռնությունն» այսօր հայտարարությամբ հանդես եկավ՝ անհանգստություն հայտնելով «Չումբո» նախաձեռնող խմբին աջակցելու և սատարելու Կրթության նախարարության պատրաստակամության վերաբերյալ։

«Տպավորություն ունենք, որ այն անձինք, ովքեր հանդիսանում են նախաձեռնող խմբի անդամներ, և ղեկավարները լիահույս չեն, որ որևէ ձևով կապ ունեն կամ տեղեկացված են, թե ինչպես պետք է կրթությունը ու հանրակրթությունը կազմակերպվի, և հանրակրթության ներսում, որպես կրթական ծրագրի բաղկացուցիչ մաս, ժամանցը երեխաների ինչպես պետք է կազմակերպվի», - «Ազատության» հետ զրույցում ասաց «Կրթական քաղաքացիական նախաձեռնության» անդամ, կրթության փորձագետ Արևիկ Անափիոսյանը:

Մանրամասները կարդացեք Azatutyun.am - ում

">