Արամ Զավենիչը չի կարողանում կողմնորոշվել Նիկոլի ու Էդմոնի միջև

Ինչպես հայտնի է, «ԵԼՔ» դաշինքում մարտավարական պառակտում է առաջացել Նիկոլի ու Էդմոնի թիմի միջև: Վերջին զարգացումները և ապագա վաևչապետի ընտրության հարցը ջրի երես են հանել Էդմոնի ու Նիկոլի միջև եղած հակասությունները: Եթե Նիկոլը կողմնակից է ընդիմադիր դեմքը պահելու համար մասնակցել նաև «փողոցային» գործընթացներին, ապա Էդմոնի պլաններում դա չկա: Էդմոնը ստացել է այս ընտրություններից առավելագույնը, հայտնվել է ԱԺ-ում: Հանդես գալով որպես «փափուկ» և «կառուցողական» ընդդիմության դիրքերից՝ նա հետագայում նպատակ ունի դառնալ «կառուցողական» իշխանության ներկայացուցիչ, քանզի իրական ընդիմության հեռանկարը անկեղծորեն չի տեսնում: Նիկոլի համար դա քաղաքական «մահ» կնշանակի , քանզի նա միշտ հանդես է եկել վառ ընդիմադիր հռետորաբանությամբ: Իսկ հետագա «կառուցողական» աշխատանքը ԱԺ-ում, առանց «փողոցային» գործնթացների, կբերի նրա վարկանիշի կտրուկ անկման:

Եթե այս գործիչների շահերն ու նպատակները պարզ են ու հասկանալի, «ԵԼՔ» -ի մյուս ներկայացուցչի, «հանրապետության» առաջնորդ Արամ Զավենիչի խնդիրը ավելի բարդ է: Բանն այն է , որ ի տարբերություն Նիկոլի նա որևէ լուրջ վարկանիշ չունի ընդդիմադիր տիրույթում: Մյուս կողմից նրա վրա մեծ է Գագիկ Հարությունյանի ազդեցությունը, որ հորդորում է Զավենիչին՝ չգնալ Նիկոլի «արմատական» ուղիով, քանզի «Վազգենի եղբայրը չպետք է իրեն անպատասխանատու պահի»: Ահա թե ինչու Արամ Զավենիչին շատ է դուր գալիս Էդմոնի «խելացի» մտածողությունը: Մյուս կողմից ընդդիմադիր տիրույթում նրան քողարկված մեղադրում են «Վազգենի եղբոր» լինելու խաղաթուղթը տեղի ու անտեղի օգտագործման համար: Ու թարսի պես, ապրիլյան վարչապետի հարցի շուրջ Արամ Զավենիչի պահվածքը լինելու է բոլորի ուշադրության կենտրոնում:

Ինչպես անել, որ Վազգեն Սարգսյանի ընկերոջ՝ Գագիկ Ջհանգիրյանի խոսքերով ասած «Եվ կույս մնալ և հաճույք ստանալ»: Ահա այդ խնդրի առաջ է կանգնած «Վազգենի գործը շարունակող» Արամ Զավենիչը:

Սակայն ինչպես բնության, այնպես էլ քաղաքականության մեջ դա համատեղելը երկար ժամանակ հնարավոր չէ, և վաղ թե ուշ Զավենիչը պետք է «հրապարակայնացնի» իր դիրքորոշումը, թե որ ուղին է ճիշտ, Նիկոլի՞նը, թե՞ Էդմոնինը:

Դավիթ Մկրտչյան