«Անվտանգության աշխատակիցներ, դուրս հրավիրե՛ք Դավիթ Ղազինյանին». Ալեքսանյանը լարեց մթնոլորտը ԱԺ–ում (վիդեո)

Ազգային ժողովի այսօրվա՝ օգոստոսի 19–ի նիստում ինչ–որ պահի իրավիճակը լարվոց։ Նիստը նախագահող ԱԺ փոխխոսնակ Վահագն Ալեքսանյանը հայտարարեց. «Պարոն Տիգրան Աբրահամյան, ձեզ հայտարարվում է նախազգուշացում։ Դուք չեք կարող ինձ հայտարարել նախազգուշացում։ Պարոն Դավիթ Ղազինյան, ձեզ ևս հայտարարվում է նախազգուշացում։

Պատգամավոր Դավիթ Ղազինյանի նկատմամբ կիրառվում է կարգապահական տույժ, մեկ նիստում խոսափողից հանդես գալու իրավունքից զրկում։ Պարոն Ղազինյան որոշել եք բոլորը ստուգեք։ Պարոն Ղազինյան, չէ, դուք չեք կարող հասկանալ։ Հարգելի գործընկերներ, սա ձեր խմբակցության նիստը չի, ուրեմն ձեզ պահեք կարգուկանոնով։ Պարոն Ղազինյան, մի խոսեք այլևս տեղից»։

«Ուժեղ Հայաստանի» պատգամավորները տեղից ինչ–որ բան էին ասում, ինչին ԱԺ փոխխոսնակն արձագանքեց. «Պատգամավոր Դավիթ Ղազինյանի նկատմամբ կիրառվում է կարգապահական պատասխանատվություն, հեռացում մինչև տվյալ օրվա ավարտը կայանալիք նիստերից՝ զրկելով այդ ընթացքում դահլիճում ներկա գտնվելու իրավունքից»։ Նա մի քանի անգամ կոչ արեց Դավիթ Ղազինյանին դուրս գալ նիստերի դահլիճից, և տեսնելով, որ դուրս չի գալիս, ներս հրավիրեց անվտանգության աշխատակիցներին, որպեսզի դուրս բերեն պատգամավորին դահլիճից։

Անվտանգության աշխատակիցները ներս մտան, որից հետո Ղազինյանը պատրաստակամություն հայտնեց դուրս գալ. ««Հարգելի գործընկերներ, ինքը դուրս է գալիս, թողեք դուրս գա»,–ասաց Վահագն Ալեքսանյանը։

Այդ ընթացքում ԱԺ ընդդիմադիր փոխխոսնակ Արամ Վարդևանյանը նկատեց, որ նման միջոց կիրառելու անհրաժեշտությունը բացարձակ չկար։

«Հայաստան» խմբակցությունից Գեղամ Մանուկյանն էլ նկատեց, որ Վահագն Ալեքսանյանը խախտում է ԱԺ կանոնակարգը և բոլոր ելույթները մեկնաբանում է։