Թուրքիան գաղտնի վերավաճառել է ռուսական S-400 զենիթային համակարգերը

Թուրքիայի կողմից Ռուսաստանից ձեռք բերված S-400 հակաօդային պաշտպանության համակարգերը վաճառվել են Պարսից ծոցի երկրներից մեկին։ Այս մասին հայտնում է Тасс-ը՝ հղում անելով թուրքական իշխանամետ լրատվամիջոցներին։

Ըստ լրատվականի՝ գործարքի մասին պաշտոնապես պետք է հայտարարվի այսօր, իսկ մինչև կեսգիշեր իրականացվել են անհրաժեշտ աշխատանքներ՝ գործարքի շրջանակում առաջացած որոշ տեխնիկական և կազմակերպչական հարցերը կարգավորելու համար։

«Իմ ունեցած տեղեկությունների համաձայն՝ S-400-ները վաճառվել են երրորդ կողմի։ Գործարքի մասին կհայտարարվի այսօր։ S-400 համակարգերը կփոխանցվեն Պարսից ծոցի երկրներից մեկին։ Այս առումով հիշատակվել են Արաբական Միացյալ Էմիրությունները և Կատարը, սակայն ավելի ճիշտ կլինի սպասել պաշտոնական հայտարարությանը», - գրել է լրատվամիջոցի սյունակագիր Աբդուլքադիր Սելվին։

Հրապարակումը հայտնվել է այն բանից հետո, երբ հուլիսի 7-8-ը Անկարայում կայացած ՆԱՏՕ-ի գագաթնաժողովի շրջանակում Թուրքիայի նախագահ Ռեջեփ Թայիփ Էրդողանը բանակցություններ էր անցկացրել ԱՄՆ նախագահ Դոնալդ Թրամփի հետ։ Հանդիպումից հետո Էրդողանը վստահություն էր հայտնել, որ Թուրքիան կվերադառնա ամերիկյան F-35 հինգերորդ սերնդի կործանիչների ծրագրին։ Իր հերթին Թրամփը հայտարարել էր, որ այդ հարցի վերաբերյալ վերջնական որոշում դեռևս չի կայացրել։

Հիշեցնենք, որ Թուրքիան 2017 թվականին Ռուսաստանի հետ կնքել էր շուրջ 2,5 միլիարդ դոլարի պայմանագիր՝ S-400 հակաօդային պաշտպանության համակարգերի չորս դիվիզիոն ձեռք բերելու համար։ 2019 թվականի հոկտեմբերին ռուսական « Рособоронэкспорт » ընկերությունը, որը « Ростех » պետական կորպորացիայի կազմում է, հայտարարել էր, որ պայմանագրով նախատեսված մատակարարումները ամբողջությամբ իրականացվել են։

Ռուսական S-400 համակարգերի գնման պատճառով Անկարան լուրջ տարաձայնությունների մեջ էր մտել Վաշինգտոնի հետ։ Արդյունքում ԱՄՆ-ը Թուրքիային հեռացրեց F-35 կործանիչների մշակման և արտադրության ծրագրից՝ պատճառաբանելով, որ ռուսական համակարգերի շահագործումը կարող է վտանգել ամերիկյան ռազմական տեխնոլոգիաների անվտանգությունը։ Այժմ թուրքական մամուլում շրջանառվող տեղեկությունները S-400-ների հնարավոր վաճառքի մասին նոր քննարկումներ են առաջացրել Թուրքիայի և ԱՄՆ-ի ռազմական համագործակցության հեռանկարների շուրջ, սակայն մինչև պաշտոնական հայտարարությունը գործարքի մանրամասները շարունակում են մնալ չհաստատված։