Ո՞րն է Փաշինյանի հույսը Մոսկվայի հետ հարաբերությունների հնարավոր խզման արդյունքում

Ինչպես և սպասվում էր, պաշտոնական Մոսկվան այդպես էլ չճանաչեց Փաշինյանի իշխանության լեգիտիմությունը հունիսի 7–ի ընտրություններից հետո։ Փաշինյանը համոզված է, որ Կրեմլի այս պահվածքը «ժամանակավոր» բնույթ կունենա, քանի որ, ըստ իր թիմակիցների, հակառակ դեպքում «Մոսկվան կարող է վերջնականապես կորցնել Հայաստանը»։

Եթե Փաշինյանի թիմի տեսակետները թարգմանենք հասարակ մարդկանց հասկանալու լեզվի, ապա կստացվի հետևյալը։ Եթե նախկինում Մոսկվան էր մտածում, որ Հայաստանը չի կարող դուրս գալ իր ազդեցության տակից, ապա այսօր ռուսները պիտի կամ համակերպվեն Փաշինյանի քայլերի հետ, կամ էլ կարող են վերջնականապես կորցնել Հայաստանը։

Ընդ որում, այս մոտեցումը Փաշինյանն կարողացել է իր թիմակիցների մեջ մտցնել և վերջիններս սկսել են անկեղծորեն հավատալ, որ ոչ թե իրենք են կախված Մոսկվայից, այլ վերջինս է կախված իրենց քաղաքական կապրիզներից։

Մի կողմ թողնենք, որ Փաշինյանի թիմակիցները շատ մակերեսային պատկերացում ունեն, թե ինչ քայլերի կարող է դիմել Մոսկվան, որի արդյունքում Փաշինյանի իշխանությունը կարող է կազմաքանդվել։ Եթե Մոսկվան որոշի գործել, ապա դրա արդյունքում հայ հանրությունը շատ արագ կարող է հասկանալ, թե ինչ վիճակում կհայտնվի Հայաստանը։

Սակայն Մոսկվան իր հերթին հասկանում է, որ իր այդ քայլերից Հայաստանը կարող է անվերադարձ կորուստներ ունենալ, որի արդյունքում տարածաշրջանում Թուրքիայի դերակատարումը կարող է որակապես փոխվել։

Ճիշտ է այդ դեպքում Հայաստան, որպես պետություն չի լինի, դե ֆակտո, սակայն դրանից կարող է էապես տուժել նաև Մոսկվան։

Այն որ Փաշինյանն օգտվում է այս իրավիճակից փաստ է, սակայն Մոսկվայում կարծում են, որ հանուն Փաշինյանի իշխանության փլուզման, վտանգավոր է ռիսկի դիմել, որի արդյունքում Հայաստանի դերը կարող է զրոյանալ և ուժեղանալ Թուրքիայի և Ադրբեջանի դերը։

Կրեմլում, հավանաբար կփորձեն գնալ ավելի մեղմ քայլերի, կիրառելով տնտեսական մեխանիզմները, որը չի ենթադրի Հայաստանի համար անվերադարձ կորուստներ։ Մեդվեդևի վերջին նախազգուշացումները, ամփոփում են բոլոր այն գնահատականները, որոնք տրվել էին նաև մյուս ռուս գործիչների կողմից։

Եվ այստեղ կարևոր է, որ Հայաստանի քաղաքական վերնախավը նույնպես ունենա իր քայլերի ճանապարհային քարտեզը, որոնք չեն բերի Հայաստանի դիրքի թուլացմանը, միաժամանակ կստիպեն Փաշինյանին գնալ զիջումների։

Սա է իրականությունը։

Արտակ Հակոբյան

Zham.am