«Հայաստանի առևանգումը» կամ ո՞վ է «փախցնելու» Փաշինյանին. DW-ի ծաղրական, բայց դիպուկ ակնարկը

«Դոյչե վելլե» ( DW - «Գերմանական ալիք») հանրահայտ հեռուստառադիոընկերության ռուսական ծառայությունը պարբերաբար թողարկում է «Արգելոց» անիմացիոն շարքը, որը քաղաքական սատիրայով անդրադառնում է միջազգային քաղաքական անցուդարձին: 
«Արգելոցի» վերջին թողարկումներից մեկում, Գայդայի «Կովկասի գերուհին» սիրված ֆիլմի ծաղրանմանակմամբ, «Հայաստանի առևանգումը» վերտառությամբ, DW-ն անդրադարձել է ԵԱՏՄ-ից «թռնելու»՝ Նիկոլ Փաշինյանի մղումներին: 

Ըստ ներկայացված դրվագի՝ Ռուսաստանի, Բելառուսի ու ԵԱՏՄ-ի այլ գործընկերների հետ «շփման» ժամանակ, հասկանալով, որ անելանելի վիճակում է հայտնվել, Նիկոլ Փաշինյանը, «քվեարկելու» պատրվակով, ելնում է սեղանի մոտից ու փորձում է փախուստի դիմել: Նկատում է «սանիտարական մեքենան», որի ղեկին Էրդողանն է: 
Փաշինյանը բացում է մեքնայի դուռը և հարցնում.
- Եվրամիություն կհասցնե՞ք...
- Նստի՛ր, վայրկենապես կսլանանք,-պատասխանում է Էրդողանը: 
- Բայց դուք հաստա՞ք Եվրամիություն եք գնում,- հարցնում է Փաշինյանը:
- Կանէշնը... Գազան ավտո է, արդեն 25 տարի Եվրամիություն է գնում ու հլա դեռ գնում է...
---
Հարկավ, «Դոյչե վելլեն» ծաղրանմանակմամբ, քաղաքական սատիրայով է նկարագրել իրավիճակը, բայց վստահաբար, դա արել է առավել քան՝ դիպուկ: 
Գործնականում տրված է Փաշինյանի ու նրա օտարերկրյա հովանավոր-աջակիցների «քաղաքականության» ամբողջ բացվածքը: Փաշինյանը Ռուսաստանից ու ԵԱՏՄ-ից փախչել ցանկանալով, իբր, դեպի Եվրոպա կամ Եվրամիություն է գնում, բայց հայտնվում է Թուրքիայի մեքենայի մեջ: Ավելի թափանցիկ երևի դժվար կլիներ նկարագրել այն ողորմելի ու ողբերգական վիճակը, որի մեջ Փաշինյանն ու ՔՊ-ն նետել են Հայաստանը: 
--
Ի դեպ, հավելենք, որ Նիկոլ Փաշինյանը «Դոյչե վելլեի» այս շարքի մշտական ու «սիրված» կերպարներից է, որին հետևողականորեն ծաղրում են, ավելի խոսակցական ասած, որի վրա մշտապես «ղժժում» են շարքի հեղինակները: Ըստ էության, Հայաստանը նաև այս՝ բազմամիլիոնանոց լսարան ունեցող հարթակում մշտական ծաղրուծանակի առարկա է դարձել:  
 
Տեսանյութը՝ այս հղումով
https://www.youtube.com/shorts/LOjh1eLp2Ug