Դանիել Իոաննիսյանը ներկայանում է որպես անկախ դիտորդ, ինձ թվում է, որ նա ՔՊ վստահված անձն է. Չալաբյանի կին

«Իրազեկ քաղաքացիների միավորում» ՀԿ ծրագրերի համակարգող Դանիել Իոսաննիսյանը հայտարարել է, որ իր հաղորդման հիման վրա են «Հայաքվե» նախաձեռնության հիմնադիր Ավետիք Չալաբյանին ձերբակալել։

«Մայիսին «Անկախ դիտորդը» հաղորդում էր տվել ՌԴ մի խումբ պաշտոնյաների կողմից ՀՀ մի շարք քաղաքացիների հետ միասին ՀՀ-ում իշխանության զավթման փորձի մասին։ Գործը հարուցվել էր։ Այնուհետև, երբ հրապարակվեց Չալաբյանի ձայնագրությունը (որտեղ նա ՌԴ ներկայացուցիչներին մատնացույց էր անում, թե ինչպես պետք է ազդեն ՌԴ-ում գտնվող ՀՀ ընտրողների վրա), այն ուղարկել ենք դատախազություն` ի լրումն մեր հաղորդման։ Հետևապես, ենթադրում եմ, որ մեր հաղորդմամբ ուղարկված փաստերի հիմքով է ձերբակալվել Ավետիք Չալաբյանը։ Հայաստանի ընտրությունների ՌԴ միջամտության բոլոր գիտակցված մասնակիցները պետք է կանգնեն դատարանի առաջ»,-գրել է նա։

Չալաբյանի կինը՝ Անահիտ Ադամյանը դատարանի շենքի դիմաց լրագրողների հետ զրույցում ասաց՝ խուզարկությունն իրենց տանը տևել է մոտ կես ժամ, արձանագրել են, որ ոչինչ չեն գտել, ապա ցույց են տվել ձերբակալման որոշումն ու ձերբակալել են Չալաբյանին։

«Ես կարծում եմ, քանի որ ընտրությունների արդյունքները հարցականի տակ են դրվում, իրենք փորձում են ընտրական պրոցեսի ակտիվ մասնակիցներին լռեցնել, մեկուսացնել։ Սա իմ անձնական կարծիքն է»,-պատճառների մասին խոսելիս նշեց Ա. Ադամյանը։

Անդրադառնալով Դանիել Իոաննիսյանի վերոհիշյալ հայտարարությանը՝ Չալաբյանի կինն ասաց, որ այդ անձնավորության մասին չէր ցանկանա խոսել, ներկայանում է որպես անկախ դիտորդ, մինչդեռ ինքը կարծում է, որ Իոաննիսյանը ՔՊ վստահված անձն է։

Մանրամասները՝ տեսանյութում։