Իրանը Փաշինյանի իշխանությանը մեղադրում է դավաճանության մե՞ջ

Իրանի նախագահի աշխատակազմի պաշտոնական ներկայացուցիչ Աբբաս Մուսավին  հայտարարել է. «Չնայած այն հանգամանքին, որ մենք շատ լավ հարաբերություններ ունենք Հայաստանի Հանրապետության հետ, մենք հայերին  զգուշացրել ենք, որ ամերիկյան ընկերությունները չպետք է մոտենան մեր սահմաններին», - հավելելով, որ հայտնի չէ՝ այդ ընկերությունները ռազմակա՞ն են, թե՞ քաղաքացիական, և, հետևաբար, Թեհրանը «հատկապես զգայուն է» լինելու այդ խնդրի շուրջ։

Փաշինյանի վարած քաղաքականությունը Իրանի իշխանությանը մոտ կանգնած վերլուծաբաններն ու դիտորդները գնահատում են որպես՝ «անշնորակալ և դավաճանական՝ Իրանի նկատմամբ»։

Նրանք հիշեցնում են, որ Իրանը չարձագանքեց եվրոպացի դիտորդների Հայաստանում տեղակայման վերաբերյալ, թեև գիտեր, որ դրանք ոչ թե սովորական դիտորդներ էին, այլ հետախույզներ, ովքեր, այդ թվում նաև Իրանի մասով էին գործում։

Այդ ժամանակ, նշում են իրանցի վերլուծաբանները, Փաշինյանի իշխանությունը դա բացատրում էր Ադրբեջանից եկող վտանգներով։ Թեև, բոլորը գիտեին, որ Ադրբեջանից վտանգների հիմնական վահանի դերը Իրանն իր վրա էր վերցրել։

Դա գիտեին, թե՛ Հայաստանում, և թե՛ Ադրբեջանում։

Սակայն Փաշինյանի իշխանությունը աչք էր փակում այդ հանգամանքի վրա և խաբում էր սեփական բնակչությանը, թե՝ իբր ադրբեջանցիներին զսպում են․․․եվրոպացի դիտորդները, իրենց հեռադիտակներով;

Սակայն, նշում են իրանցի վերլուծաբանները,  հայկական անշնորհակալության դրսևորումը իրեն ուշացնել չտվեց.  պարզվեց, որ Երևանը գաղտնիության պայմաններում, նորանոր վտանգներ է փորձում ստեղծել իր անմիջական հարևան Իրանի և Ռուսաստանի համար։

Եվ ահա այսօր, նշում են վերլուծաբանները, Մուսավին ստիպված է խոստովանել, որ Թեհրանի մեջքի ետևում Երևանը տարածաշրջան է բերել ամերիկյան կառույցներ։ Այլ կերպ ասած՝ Հայաստանը, որի համար Իրանը տարիներ շարունակ զոհաբերել է Բաքվի հետ հարաբերությունները, կրկին կատարել է իր որոշումը՝ դավաճանելով իր նախկին հովանավորին։

«Այս ամենը հստակ ցույց է տալիս, որ Հայաստանը արագորեն վերածվում է ոչ միայն Արևմուտքի և Ռուսաստանի միջև բախման ասպարեզի (ինչպես հստակ ցույց տվեցին վերջին խորհրդարանական ընտրությունները), այլև Արևմուտքի և Իրանի միջև ուղղակի աշխարհաքաղաքական բախման գոտու։ Երևանը, իր ինքնիշխանությունը հեզորեն զիջելով արտաքին ուժերին, վտանգում է իր բոլոր հարևանների անվտանգությունը», - նշում են իրանցի վերլուծաբանները։

Իրանցի վերլուծաբանների այս արձագանքներին, լայնորեն սկսում են ձայնակցել նաև ադրբեջանցի վերլուծաբանները։

«Հայերը իրենց ողջ պատմության ընթացքում զբաղված են եղել իրենց դաշնակիցներին դավաճանելով։ Սկզբից նրանք 1–ին համաշխարհային պատերազմի ընթացքում դավաճանեցին Օսմանյան կայսրությանը, հետո դավաճանեցին Ռուսաստանին և վերջապես հերթը հասավ Իրանին։ Այս հարցի միակ լուծումը այս ժողովուրդին պատժելն է»,– փաստացի իրանցիներին ու ռուսներին, առաջարկում են ադրբեջանցի վերլուծաբանները։

Պետք է նշել, որ արտերկրում ոչ ոք չի դիտարկում, որ Հայաստանի բնակչության մեծ մասը չի ընդունում Փաշինյանի իշանության լեգիտիմությունը։

Բանն այն է, որ արտերկում ժողովուրդի տեսակետը համարում են տվյալ երկրի ղեկավարի  վարվող քաղաքականության ուղենիշը և հենց դրանից են առաջ է գալիս իրենց գնահատականները։

Եթե այս իրավիճակը պահպանվի, իսկ անցած ընտրությունները փաստացի չփոխեցին իրավիճակը, ուրեմն այս ամենի համար վճարելու են հայ ժողովուրդն ու Հայաստան պետությունը։

Սա է իրականությունը։

Արտակ Հակոբյան
Zham.am