Կիրակի օրը հավաքվում ենք ԿԸՀ-ի մոտ եւ տեր ենք կանգնում մեր իրավունքին. Արման Աբովյան

Այն, ինչ այժմ տեղի է ունենում «Բարգավաճ Հայաստան» կուսակցության ձայների հետ, վերաբերում է բացարձակապես յուրաքանչյուր քաղաքացու, որի իրավունքներն այսօր իշխանությունը ցինիկաբար ոտնահարում է։ Այս մասին հունիսի 12-ին Կենտրոնական ընտրական հանձնաժողովի շենքի մոտ կայացած հանրահավաքում հայտարարել է «Բարգավաճ Հայաստան» կուսակցության քաղաքական խորհրդի անդամ Արման Աբովյանը։

Նա ընդգծել է, որ երկրի գործող ղեկավարությունը՝ Նիկոլ Փաշինյանի գլխավորությամբ, ուղիղ բռնություն է գործադրում ավելի քան կես միլիոն ընտրողների կամքի նկատմամբ, որոնց ավելի վաղ բարձրաստիճան պաշտոնյաները հրապարակայնորեն վիրավորել էին։ Աբովյանի կարծիքով՝ ձայների հաշվարկի հետ կապված մեքենայությունների իրական նպատակը լիովին ակնհայտ է։ «Հնարավոր ու անհնար միջոցներով ուզում են հասնել մի իրավիճակի, երբ կկարողանան Ալիևի և Էրդողանի ցանկությունները և հրահանգները կատարել»,– նշել է նա։

Քաղաքական գործիչը նաև հավաստիացրել է ներկաներին, որ ընդդիմությունը կօգտագործի բոլոր հասանելի իրավական մեխանիզմները՝ ընտրությունների արդյունքները պաշտպանելու համար, և զգուշացրել է ընտրական հանձնաժողովի անդամներին հասարակության զգոնությունը բթացնելու փորձերից։ «Ոչ մեկի մտքով չանցնի մեր գլխի տակ փափուկ բարձ դնել, սատանի մայլեն քյանդրբազություն մի արեք, ձեզանից լավ ենք ամեն ինչ հասկանում»,– հայտարարել է Աբովյանը։

Ամփոփելով՝ նա քաղաքացիներին առավելագույն մոբիլիզացիայի կոչ է արել՝ քվեարկության պաշտոնական արդյունքների առաջիկա հրապարակումից առաջ։ Արման Աբովյանն ընդգծել է, որ կիրակի օրը, երբ Կենտրոնական ընտրական հանձնաժողովը կսկսի հրապարակել վերջնական տվյալները, բոլորը պարտավոր են միահամուռ հավաքվել ԿԸՀ շենքի մոտ և տեր կանգնել իրենց իրավունքներին ու Հայաստանի Հանրապետության ապագայի պաշտպանությանը։ Նա եզրափակել է, որ ընդդիմության համար կարևոր և սրբազան է յուրաքանչյուր քաղաքացու ձայնը՝ անկախ նրանից, թե որ քաղաքական ուժի օգտին է այն տրվել։
Աղբյուր՝ News.am