Ընտրությունները Փաշինյանը չի հաղթել, քայլեր կանենք. Սամվել Կարապետյանը խոսեց

Հունիսի 7-ին կայացած ընտրությունները լիովին տապալված և կեղծված են։ Այս մասին հայտարարել է գործարար և բարերար, «Ուժեղ Հայաստան» կուսակցության առաջնորդ Սամվել Կարապետյանը՝ լրատվամիջոցների ներկայացուցիչների հետ զրույցում։

Ճնշման և ահաբեկման պայմաններում ընտրություններ չեն անցկացվում. մարզերում ձերբակալվել են մեր 780 համակարգողները, հիշեցրել է Կարապետյանը։ Նա նշել է, որ կուսակցությունը դիմել է ԿԸՀ, ապա կդիմի նաև ՍԴ։ Պահանջն է՝ անցկացնել ընտրությունների երկրորդ փուլ։

«Մեր խնդիրը խորհրդարանում ներկայացված լինելը չէ, այլ Փաշինյանին հեռացնելը», - ընդգծել է Կարապետյանը։ Այն հարցին, թե ինչպես դա անել՝ խորհրդարանո՞վ, թե՞ փողոցով, քաղաքական գործիչը հնարավոր է համարել երկու տարբերակն էլ։ Փողոցի տարբերակի դեպքում նա որևէ մեկ առաջնորդի չի առանձնացրել՝ միայն նշելով, որ բոլորը տուժել են Փաշինյանի նախընտրական արշավի քաղաքականությունից, և այդ պատճառով բոլորը կմասնակցեն։

«Եթե նրանց խելքը հերիքի, եթե Փաշինյանը վստահ է իր հաղթանակին, ապա կհամաձայնեն մեր պայմաններին, մենք առաջարկում ենք երկրորդ փուլ։ Ոչ լեգիտիմ իշխանությունը երկրի համար հսկայական սպառնալիքներ է ստեղծում», - հայտարարել է քաղաքական գործիչը՝ ընտրողներին կաշառելու մասին հայտարարությունները գնահատելով որպես անհեթեթություն։ Միևնույն ժամանակ, եթե ընտրակաշառքի մասին տեղեկությունները հաստատվեն, ապա կազմակերպիչներն ու կատարողները արժանի են խիստ դատապարտման, նշել է Կարապետյանը։

Վա-բանկ գնալու պատրաստակամության մասին հարցին Կարապետյանը նշել է, որ եթե ուզենային, հենց առաջին օրը կարող էին վա-բանկ գնալ, բայց չեն գնացել, որովհետև ցանկացել են շարժվել օրինական ճանապարհով։ «Մենք մեր որոշումներն ինքներս ենք ընդունում, ուրիշների որոշումներին էլ չենք միջամտում։ Մեր նպատակն է Նիկոլ Փաշինյանին իշխանությունից հեռացնել օրինական ճանապարհով», - ընդգծել է Կարապետյանը։ Նա հայտնել է, որ Գագիկ Ծառուկյանի և Ռոբերտ Քոչարյանի հետ չի հանդիպել։

«Փաշինյանը չի հաղթել, նրանք դա գիտեն, մենք դա գիտենք, աշխարհն էլ է տեսնում։ Հայաստանը պետք է լեգիտիմ իշխանություն ունենա։ Մենք չենք հաղթել։ Փաշինյանն էլ չի հաղթել։ Պարտվել է հայ ժողովուրդը», - կրկնել է Կարապետյանը։
Աղբյուր՝ News.am