Կիպրոսի նորանշանակ դեսպանն իր հավատարմագրերի պատճենն է հանձնել Հայաստանի արտգործնախարարին
Մարտի 5-ին արտգործնախարար Էդվարդ Նալբանդյանն ընդունել է Կիպրոսի նորանշանակ դեսպան Լեոնիդաս Մարկիդեսին (նստավայրը՝ Մոսկվա) հավատարմագրերի պատճենի հանձնման կապակցությամբ: Այս մասին տեղեկացնում են ՀՀ ԱԳՆ լրատվական ծառայությունից։
Շնորհավորելով դեսպան Մարկիդեսին նշանակման կապակցությամբ՝ նախարար Նալբանդյանը բարձր է գնահատել հայ-կիպրական եղբայրական հարաբերությունները և հաջողություն է մաղթել նրա առաքելության մեջ՝ հույս հայտնելով, որ դեսպանն իր ակտիվ գործունեությամբ նոր լիցք կհաղորդի երկկողմ փոխգործակցությանը:
Շնորհակալություն հայտնելով ընդունելության և բարեմաղթանքների համար՝ դեսպան Մարկիդեսը վստահեցրել է, որ կներդնի առավելագույն ջանքերը Հայաստանի և Կիպրոսի միջև օրինակելի համագործակցությունն առաջ մղելու համար:
Զրուցակիցներն անդրադարձել են քաղաքական երկխոսության, միջազգային կառույցներում փոխգործակցության, առևտրատնտեսական հարաբերությունների զարգացման, իրավապայմանագրային դաշտի ընդլայնմանն առնչվող հարցերի, քննարկել են տուրիզմի, մշակույթի բնագավառներում փոխգործակցության ընդլայնման նպատակով ձեռնարկվելիք քայլերը:
Էդվարդ Նալբանդյանն ու Լեոնիդաս Մարկիդեսն արժևորել են կիպրահայ համայնքի դերակատարությունը ինչպես Կիպրոսի զարգացման գործում, այնպես էլ երկկողմ հարաբերությունների խորացմանն ուղղված նախաձեռնությունների տեսանկյունից։
Երկուստեք կարևորվել է Հայաստան-Եվրամիություն Համապարփակ և ընդլայնված գործընկերության համաձայնագիրը, որը նոր հեռանկարներ է բացում ինչպես երկկողմ, այնպես էլ բազմակողմ ձևաչափերում համագործակցության խորացման համար:
Հետևեք մեզ Facebook-ում