Ո՞րն է ՀՅԴ-ի դժգոհության պատճառը Սերժ Սարգսյանից

Այսօր բոլոր լրատվամիջոցները ցիտում են ճեպազրույցում  հնչած Արմեն Ռուստամյանի  այն խոսքերը, ըստ որի «ցանկացած մարդ պետք է իր խոսքի տերը լինի, եթե խոսքի տերը չէ, ապա ինքը ընդհանրապես անելիք չունի հասարակության մեջ: Իր խոսքը պահելը մարդու ամենակարևոր բարոյական արժեքն է, շատ պիտի մտածես, թե ինչ ասես»,- ցիտատի վերջ: Ճիշտ է, մինչև դա նա նշեց, որ «քաղաքականության մեջ ոչինչ բացառել հնարավոր չէ»: Արմեն Ռուստամյանն այս ամենը ասաց Սերժ Սարգսյանի նախկինում տված խոստման հետ կապված, ապագայում վարչապետի պաշտոնին չհավակնելու վերաբերյալ: Ճիշտ է ՀՅԴ ներկայացուցիչը նշեց, որ վարչապետի թեկնածությունը պետք է ներկայացնի ՀՀԿ -ն, որպես ԱԺ-ում մեծամասնություն ունեցող ուժ, իսկ ՀՅԴ-ն էլ կընդհունի դա, սակայն այս ամենի հետ մեկտեղ իրեն թույլ տվեց իր այս լիրիկա-քաղաքական շեղումը: Ֆորմալ տեսանկյունից ՀՀԿ-ական իր գործընկերները իրեն չեն կարող մեղադրանքներ ներկայացնել, որովհետև Ռուստամյանի քաղաքական գնահատականների մեջ ոչ մի հակահհկական ձևակերպումներ չկան: Սակայն Ռուստամյանը Սերժ Սարգսյանի մասով իրենց վերապահումն է անում, կարծես մեսիջ ուղարկելով հասարակությանը՝ «Սերժ Սարգսյանի թեկնածության հարցը մեր ձեռքում չէ, այն ՀՀԿ-ից է կախված, լավ կլիներ որ նրա տեղը այլ մարդ լիներ»: Ճիշտ է, Ռուստամյանը դա որպես քաղաքական պահանջ չի ներկայացնում, այն փաթեթավորելով լիրիկական ձևակերպումներով, սակայն իր մեսիջը հասցնում է հասարակությանը:

Ի՞նչ կարող է դա նշանակել

ՀՅԴ-ում շատ լավ են հասկանում, որ ՀՀԿ-ի թեկնածուն լինելու է Սերժ Սարգսյանը: Սակայն վերջինս ունի հոգեբանական խնդիրներ՝ կապված փաստացի 3-րդ անգամ երկրի ղեկավար դառնալու կապակցությամբ: Եվ այստեղ ամենևին էլ կարևոր է, թե ինչպես կկոչվի այդ պաշտոնը՝ ՀՀ նախագահ, թե՝ ՀՀ վարչապետ: Իսկ ՀՅԴ –ն սահմանադրության փոփոխության ժամանակ նշում էր, որ ամենևին էլ որևէ անձի շահերի սպասարկումով չէ կապված իրենց դիրքորոշումը: Ավելին, ՀՅԴ- ին նույնիսկ շահավետ էր, որ Սերժ Սարգսյանը չլինի ապրիլից հետո վարչապետի պաշտոնում: եվ այստեղ կա մի քանի պատճառ: Նախ ցանկացած այլ գործչի պարագայում ՀՅԴ-ի դիրքերը իշխանության համակարգում կմեծանար: ՀՀԿ- ում կսկսվեին կենտրոնախույս գործընթացներ, և այդ կառույցի դերը կթուլանար: Կթուլանար նաև ապագա վարչապետի դերը, և ճիշտ հակառակը, կմեծանար ԱԺ-ի և ՀՀ նախագահի դերակատարումը: Պետական կառավարման համակարգում կսկսվեին կենտրոնախույս գործընթացներ, և այս պարագայում ՀՅԴ-ի դիրքերը միայն կուժեղանային:

Այսօր Սերժ Սարգսյանից բացի ոչ ոք ՀՀԿ-ում չի կարող բոլորին համախմբել իր շուրջ: Դա նույնպես հասկանում են ՀՅԴ-ում, դրա համար էլ Սերժ Սարգսյանին «խայթելով», փորձում են նրա հետ սակարկել իրենց դիրքերի լրացուցիչ դիվիդենտներ ստանալու վերաբերյալ՝ հետապրիլյան իշխանության համակարգում: Սերժ Սարգսյանին սպասվում են դժվարին փորձություններ ապրիլից հետո, սակայն նրանից զիջումներ կորզելը հնարավոր է այսօր, և դա շատ լավ հասկանում են դաշնակցականները: Ահա թե ինչու են նրանք իրենց դիրքերը փորձում ամրապնդել այսօր, այսպես ասած, «նախընտրական» փուլի ընթացքում: Ճիշտ է, սա դասական իմաստով նախընտրական արշավ չէ բայց և սովորական պրոցեդուրալ միջոցառումներ էլ չեն, որ ՀՅԴ - ն հանգիստ սպասի, թե ինչ է իրեն սպասվելու հետապրիլյան փոփոխություններից հետո, երբ արդեն ոչ մեկից ոչ մի բան հնարավոր չի լինի ուզել:

Արտակ Հակոբյան