«Գազպրոմ»-ը «Նաֆտոգազ»-ի հետ պայմանագրերի խզման գործընթաց է սկսել

Ռուսական «Գազպրոմ» ընկերությունը Ստոկհոլմի արբիտրաժային դատարանում ուկրաինական «Նաֆտոգազ»-ի  հետ պայմանագրերի խզման գործընթաց է սկսել: Այս մասին, ինչպես տեղեկացնում է ՏԱՍՍ-ը, լրագրողների հետ զրույցում հայտնել է ընկերության խորհրդի նախագահի տեղակալ Ալեքսանդր Մեդվեդևը:

«Եվ «Գազպրոմի» այս հայցի վերաբերյալ նոր գործը Ստոկհոլմի արբիտրաժային դատարանում հաստատապես կքննի արբիտրների մեկ այլ կազմ», - հայտարարեց Մեդվեդևը:

Հիշեցնենք, որ փետրվարի 28-ին Ստոկհոլմի արբիտրաժը պարտավորեցրել է «Գազպրոմ»-ին 4,6 մլրդ դոլլար վճարել «Նաֆտոգազ»-ին տարանցիկ գազի համաձայնեցված ծավալները չմատակարարելու համար:  Հաշվի առնելով Արբիտրաժի նախորդ որոշումը, համաձայն որի՝ «Նաֆտոգազ»-ը պարտավոր է ռուսական կողմին մատակարարված գազի համար վճարել 2 մլրդ դոլար, «Գազպրոմ»-ը պարտավոր է վճարել 2,56 մլրդ դոլլար:

Այդ կապակցությամբ «Գազպրոմ»-ի ղեկավար Սերգեյ Միլլերը մարտի 2-ին հայտարարել է, որ ստիպված է անմիջապես խզել պայմանագրերն ուկրաինական կազմակերպության հետ: Սակայն պաշտոնական Կիևում կարծիք են հայտնել, որ համագործակցության շրջանակներում չի նախատեսվում պայմանագրերի միակողմանի խզումը, և «Գազպրոմ»-ի այդ քայլի պարագայում նրանք կդիմեն դատարան:

Zham.am