Հանկարծ Փաշինյանի ականջը չընկնի... ԱՄՆ Պետքարտուղարությունը Թրամփի պատկերով անձնագրերի սահմանափակ քանակով սերիա է պատրաստում

ԱՄՆ Պետքարտուղարությունը ծրագրում է անձնագրերի սահմանափակ սերիա թողարկել՝ նվիրված երկրի 250-ամյակին, որոնցում պատկերված կլինի նախագահ Դոնալդ Թրամփը, հաղորդում է Fox News-ը։

Ըստ ներկայացված մակետի՝ փաստաթղթի ներքին էջում Թրամփի դիմանկարը զետեղված կլինի Անկախության հռչակագրի տեքստի և ամերիկյան դրոշի հետնապատկերին։ Մեկ այլ էջում պատկերված է նաև Ջոն Թրամբուլի «Անկախության հռչակագիրը» կտավը՝ նվիրված ԱՄՆ հիմնադիր հայրերին։

Պետքարտուղարության ներկայացուցիչը հեռուստաալիքին հայտնել է, որ նոր անձնագրերը հասանելի կլինեն ԱՄՆ բոլոր այն քաղաքացիներին, որոնք դիմում կներկայացնեն դրանց ստացման համար։ Սերիայի թողարկումը սպասվում է մինչև հուլիս՝ երկրի 250-ամյակի տոնակատարությունների շրջանակում։

Fox News-ը նշում է, որ նախաձեռնությունը Վաշինգտոնում մի շարք միջոցառումներ, դրանց թվում՝ մարզական իրադարձություններ և հանրային տոնակատարություններ ներառող «America250» ծրագրի մի մասն է։