Փաշինյանի շարասյան մասնակցությամբ վթարի զnh դարձած Սոնա Մնացականյանի գործով վերաքննիչ բողոքի քննությունն ավարտվել է

31 շաբաթական հղի Սոնա Մնացականյանին մահացու վրաերթի ենթարկելու գործով վերաքննիչ դատարանը մայիսի 18-ին կհեռանա խորհրդակացական սենյակ՝ որոշում կայացնելու։

Նշենք, որ Երևանի ընդհանուր իրավասության դատարանի դատավոր Կարեն Ֆարխոյանի որոշումը՝ Սոնա Մնացականյանին մահացու վրաերթի ենթարկելու գործով Նիկոլ Փաշինյանի ավտոշարասյան վարորդներից Արամ Նավասարդյանի նկատմամբ նշանակված պատիժը՝ ազատազրկում 1 տարի 6 ամիս ժամկետով, բողոքարկել է և տուժող կողմը, և պաշտպանական կողմը։ Գործը մակագրվել էր վերաքննիչ դատաանի դատավոր Ռոբերտ Պապոյանին։

Տուժողի իրավահաջորդ Րաֆֆի Ասլանյանը Panorama.am-ի հետ զրույցում ասաց, որ կայացել են 3-4 նիստեր, կողմերը ներկայացրել են իրենց բողոքները, տվել բացատրություններ, հանդես եկել եզրափակիչ ելույթներով։

«Դատարանն, ըստ էության, ժամանակի սղության պատճառով,  որպեսզի հասցնի ողջ ծավալին ծանոթանալ, հետաձգել է նիստը։ Մայիսի 18-ին նիստը կհայտարարեն բացված, ապա կհեռանան խորհրդակացական սենյակ՝ որոշում կայացնելու, եթե, իհարկե, արտառոց բան չլինի»,- ասաց փաստաբանը։

Նշենք, որ դատախազությունը չէր բողոքարկել առաջին ատյանի որոշումը, թեև մեղադրողի միջնորդած պատժից դատավորն ավելի ցածր պատիժ է նշանակել։ Ասլանյանն ասաց, որ դատախազը վերաքննիչ դատարանում չի ներկայացել նիստերին։ 

Պաշտպանը հիշեցրեց, որ իրենք միջնորդել էին ավելի խիստ պատիժ նշանակել, գույքային հայցն ամբողջությամբ բավարարել. «Թե ինչ կլինի, չենք կարող ասել»։

Մեղավոր ճանաչված Արամ Նավասարդյանը չի տեղափոխվել քրեակատարողական հիմնարկ, ազատության մեջ է,  քանի որ դատավորի որոշմամբ, մեղադրյալն ազատության մեջ է թողնվել մինչև դատարանի որոշումն օրինական ուժի մեջ մտնելը։

Իսկ դատական ակտն օրինական ուժի մեջ է մտնում դիմելու դեպքում վերաքննիչ դատարանի,  նաև վճռաբեկ դատարանի որոշումները հրապարակվելուց հետո։

Դիտարկմանը՝ երբ գործը քննվում էր առաջին ատյանում, անընդհատ խոսվում էր, որ միտումնավոր ձգձգվում է քննությունը, որպեսզի վաղեմության ժամկետը լրանա, Ասլանյանն ասաց. «Վերաքննիչում ավարտել ենք, վաղեմության ժամկետին 11 ամիս կա։ Եթե վերաքննիչ դատարանը դատական ակտը չուշացնի ու կայացանի նոր որոշում ի օգուտ մեզ, կամ ամփոփոխ թողնի առաջին ատյանի որոշումը, վեղամության խնդիր չի առաջ։

Վճռաբեկ դիմելու դեպքում պետք է սահմանափակ ժամկետում որոշում կայացվի, որպեսզի ժամկետը չլրանա։ Այդ բոլորը գուշակելու հարցեր են, հստակ չենք կարող ասել»։

Հիշեցնենք, որ դատարանի 2024 թ. օգոստոսի 8-ին կայացրած վճռով Արամ Նավասարդյանը մեղավոր է ճանաչել 2003 թ. Ընդունված ՔՕ 242-րդ 2 մասով (Ճանապարհային երթևեկության անվտանգության ապահովմանն ուղղված պահանջները  կամ ճանապարհային երթևեկության  կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) և 244-րդ հոդվածի 1-ին մասով (Ճանապարհատրանսպորտային պատահարի վայրը թողնելը) նախատեսված արարքներում։

2022 թ. ապրիլի 26-ին՝ ժամը 18:05-ի սահմաններում, Պարոնյան-Լեո փողոցների խաչմերուկում ՀՀ ոստիկանության «Ճանապարհային ոստիկանություն» ծառայության ուղեկցող սպայական վաշտի հրամանատար Արամ Նավասարդյանի իր կողմից վարած «Տոյոտա Պրադո» մակնիշի ավտոմեքենայով վրաերթի է ենթարկել Արարատի մարզի 28-ամյա բնակչուհուն, որի հետևանքով ստացած մարմնական վնասվածքներով վերջինս տեղափոխվել է «Նաիրի» բժշկական կենտրոն, որտեղ գիտակցության չգալով՝ մահացել է: Նշված ավտոշարասյունն ուղեկցելիս է եղել Նիկոլ Փաշինյանին, իսկ մահացած կինը հղի է եղել։