Դեղերի ոլորտի կարգավորմամբ ոչ մի հավելյալ ծախս չի նախատեսվում, և չենք կանխատեսում, որ դեղերը ինչ-որ չափով թանկանալու են. Լևոն Ալթունյան

Այսօրվանից ուժի մեջ է մտնում դեղերի կարգավորման մասին օրենքը, որով կարգավորվում է դեղերի շրջանառությունը Հայաստանում: 4500 դեղամիջոցներից 2500-ը բաց են թողնվելու դեղատոմսերով, իսկ 2000-ը կմնան ազատ վաճառքի մեջ: Այս մասին այսօր կառավարության նիստից հետո լրագրողների հետ զրույցում ասաց ՀՀ առողջապահության նախարար Լևոն Ալթունյանը:

Նա ասաց, որ բժշկի նշանակման ներքո են անցնում հիմնականում այն դեղերը, որոնք հոգեմետ միջոցներ, նարկոտիկ նյութեր են պարունակում։ Նա նշեց, թե այս օրենքը Հայաստանին կմոտեցնի քաղաքակիրթ երկրների շարքին, որտեղ տասնյակ տարիներով դեղամիջոցները կարգավորում են համապատասխան օրենքներով:

Նախարարը հավաստիացրեց, որ դեղերը դեղատոմսով բաց թողնելու գործընթացը քննարկվել է մասնագետների հետ, իսկ հասարակության լայն շրջանակների հետ քննարկումը կատարվում է համապատասխան կայքում հրապարակումից հետո:

«Ես կարծում եմ, որ հիմնական դժգոհությունները պայմանավորված են անտեղյակ լինելով»,-ասաց նա:

Առողջապահության նախարարն ասաց, որ պոլիկլինիկաներն արդիականացնելը, ժամանակակից տեխնիկայով հագեցնելը պրոցես է, որը տևելու է ամբողջ կյանք և միշտ լինելու են նոր մեթոդներ, նոր սարքավորումներ:

«Դեղերի կարգավորմամբ ոչ մի հավելյալ ծախս չի նախատեսվում»,-ասաց նա:

Լևոն Ալթունյանը նշեց, որ կառավարությունն աշխատում է իր նախատեսած ժամանակացույցով: Նա նշեց, որ այս օրենքի նախագիծը ներկայացվել է 2015 թվականին, ընդունվել է 2016 թվականին, ուժի մեջ է մտել այս տարվա մարտի մեկից:

«Արդեն իսկ կարգավորված կյանքի ցանկացած փոփոխության ընթացքը առաջացնում է համապատասխան դիսկոմֆորտ, իսկ ցանկացած դիկսոմֆորտ առաջացնում է առաջին հերթին դժգոհություն, իսկ երբ մարդ տեսնում է, որ դրանից հետո գալիս են դրական փոփոխություններ՝ գոհունակություն: Մենք այսօր ունենք փոփոխությունների առաջին էտապի հակազդեցության հետ, ես համոզված եմ, որ կլինի երկրորդ՝ ավելի դրական էտապը»,-ասաց նա:

Հարցին, թե ինչի հիման վրա է փուլ-փուլ իրականացվում դեղերի կարգավորման գործընթացը, Լևոն Ալթունյանն ասաց, որ թե որոշման մեջ գրվելու է փուլ-փուլ, իսկ որոշումը մշակվում է և կընդունվի կառավարության մյուս նիստերի ընթացքում:

«Մենք չենք կանխատեսում, որ դեղերը ինչ-որ չափով թանկանալու են, եթե դեղերը էժանացել էին այն դեղերի հաշվին, որոնք պետք չէին բնակչությանը, բայց ուղղակի վաճառվում էին, մենք խոչընդոտում ենք հենց այդ գործընթացը, որ բնակչությանը չվաճառվեն այն դեղերը, որոնք իրենց պետք չեն»,-ասաց նա:

Ինչ վերաբերում է ապրիլից հետո վերանշակմանը, ասաց բոլոր հարցերի պատասխանները կիմանան ապրիլի վերջին:

Լիանա Առաքելյան

Tert.am