Ինչու՞ իշխանությունը որոշեց «դեղին» քարտ ցույց տալ Նիլոլ Փաշինյանին

ԱԺ-ում Բարձրագույն դատական խորհրդի անդամների քվեարկությունը «անակնկալով» ավարտվեց: Պարզվեց, որ Գագիկ Հարությունյանի դեմ քվեարկել է «ԵԼՔ» դաշինքից ընդամենը երկու հոգի: Մինչդեռ, հրապարակավ հայտարարվել էր, որ դաշինքի 7 թեկնածուներն էլ դեմ են քվեարկելու: Օրինակ, նախկին դատախազի դեմ քվեարկել էին հենց 7 հոգի: Նիլոլը և իր ընկերները իհարկե համարում են, որ այստեղ խաբեություն է տեղի ունեցել հաշվիչ հանձնաժողովի ՀՀԿ-ական անդամների կողմից: Սակայն շատերին սա հիշաեցրեց Վանաձորի ավագանու ընտրությունների պատմությունը, երբ Արթուր Բաղդասարյանի կողմնակիցները մինջև վերջ հերքում էին իրենց կապը իշխանության հետ: Մեծ հաշվով Նիկոլը հայտնվել է հայտնի ռուսական ասացվածքի թակարդում, ըստ որի «то ли он украл, то ли унего украли»:

Մեծ հաշվով դժվար է ասել , թե ով է այստեղ ստում, բայց որ անվստահության մթնոլորտը «ԵԼՔ»-ի շուրջ արդեն ձևավորվել է, փաստ է: Եվ հենց այս նպատակն էլ հետապնդում էր իշխանությունը, որն ուղղված էր կոնկրետ Նիկոլ Փաշինյանի դեմ:

Բանն այն է, որ Նիկոլի պահվածքը վերջերս խիստ նյարդայնացնում է իշխանություններին: Ոչ այն պատճառով, որ Բաղրամյան 26 ը վախենում է Նիկոլից: Խնդիրը կայանում է նրանում, որ այսօր ստեղծվել է անվստահության մտնոլորտ ընդհանրապես, կապված այն հանգամանքի հետ, որ ոչ ոք չգիտի, թե ինչպես է անցնելու այս անցումային փուլը «հին» համակարգից «նորին» : Եվ այս փուլում ցանկացած լարվածություն նյարդայնացնում է Բաղրամյան 26-ին: Եվ այստեղ նույնիսկ կարևոր չէ, թե Նիկոլը ինքնակա՞մ է այս քայլերը անում, թե՞ ուղորդվում է ինչ որ մի ավելի լուրջ իշխանական կամ օլիգարխիկ խմբավորման կենտրոնից:

Ցանկացած տարբերակում Նիլոլի այսօրվա պահվածքը նյարդայնացնող է դառնում, ահա թե ինչու Բաղրանյան 26-ը որոշեց «դեղին» քարտ ցուց տալ Նիկոլին:

Այս քայլից հետո Նիկոլը նախ պետք է իր դաշինքին կասկածի, մանավանդ որ վերջին ժամանակներս մամուլը ակտիվորեն ներկայացնում է այս դաշինքում հակասությունների առկա խնդիրները:

Գագիկ Հարությունյանի շուրջ քվեարկությամբ Բաղրամյան 26-ը մեսիջ ուղարկեց բոլորին, որ Նիկոլի «քարտը» լուրջ չէ և իմաստ չունի այն ընդհանրապես խաղարկել՝ ակնարկելով, որ «ԵԼՔ»- ը գտնվում է Բաղրամյան 26-ի «վստահելի ձեռքերում»:

Իսկ եթե որև է մեկը կասկածում է, որ այս քվեարկության ընթացքում ՀՀԿ-ն է խարդախություն արել, ապա պետք է հռետորական հարցադրում անի Նիկոլին: Ինչու՞ «ԵԼՔ»-ի անդամները իրենց քվեարկությունը չնկարեցին բջջային հեռախոսով, չէ՞ որ Նիկոլը այդ փորձը ուներ, և դա կարող էր լինել իրենց ճշմարիտ լինելու հանգամանքը:

Այդ հարցի պատասխանն էլ Նիկոլը չունի, իսկ այն թեզը, թե իր թիմին նա վստահում է և ոչ մեկին չի կասկածում անազնվության մեջ, ապա պետք է բացատրի, թե ինչպես ստացվեց, որ իրենց նախկին թիմի ներկայացուցիչը հայտնվել էր Բարձրագույն դատական խորհրդի կազմում, խոսքը Լիպարիտ Մելքջանյանի մասին է: Եվ եթե դա հնարավոր է, ապա ինչու՞ հնարավոր չէ նման «լիպարիտների» գոյությունը «ԵԼՔ» ում : Վերջապես, ինչու՞ Լենա Նազարյանը հաստատեց քվեարկության այն արդյունքները, որոնք Նիկոլ Փաշինյանը համարում է կեղծված:

Արտակ Հակոբյան