Ես երիտասարդին հարվածողի ձեռքից բռնել եմ, ասել եմ՝ դուրս եկեք. Գեւորգ Գեւորգյանը 5 մլն դրամ գրավով ազատ արձակվեց

Այս ամենն այնքան աբսուրդի ժանրից է, իրականում խնդիրը այն է, որ ես նայել եմ Նիկոլի աչքերի մեջ և ըստ երևույթի դա արդեն վախ է բերել։ Այս մասին, այսօր՝ մարտի 31–ին, Քննչական կոմիտեի Երևան քաղաքի քննչական վարչությունից դուրս գալուց հետո լրագրողների հետ զրույցում նշեց հասարակական գործիչ Գևորգ Գևորգյանը՝ անդրադառնալով մարտի 29–ին, Սուրբ Աննա եկեղեցում տեղի ունեցած միջադեպին։

«Գիտեք ես կազմակերպել եմ և պլանավորել եմ քաղաքի, գյուղերի, Արցախի ազատագրումները։ Ես երբ մի բան պլանավորում, կազմակերպում էի, դա ազատագրում էր։ Ես երկրի ազատագրման գործում եմ եղել, այլ ոչ թե ես կարող էի պլանավորել առավելևս սենց երիտասարդներով։ Ինձ ներկայացնում են, որ իմ աչքերն են առանձնացրել, իմ հայացքները։ Այսինքն եթե իմ հայացքից ինքը  այդպես լուրջ վախեր է ունենում, ուրեմն մենք շատ ավելի վատ իրավիճակում ենք, քան կարելի է պատկերացնել»,–ասաց նա։

Գևորգ Գևորգյանը տեղեկացրեց, որ իրեն մեղադրանք է առաջադրվել և խափանման միջոց է ընտրվել 5 մլն դրամի գրավը։

«Իրենք կասկածում են, որ իբր ես կազմակերպել եմ և հետո, երբ տեսել եմ, որ հարվածում են երիտասարդին, ձեռքից բռնել եմ, ասել եմ՝ դուրս եկեք, եկեղեցում այսպիսի բաներ չեն անում։ Եթե կա Հայաստանի Հանրապետությունում մի հայ կամ առավելևս քրիստոնյա, ով Սուրբ պատարաքի ժամանակ ծաղկազարդի օրը, թույլ է տալիս, որ ինչ-որ մեկը 18 տարեկան երիտասարդին հարվածեն, ու ինքը ձեռքից չի վերցնում ու չի ասում՝ դուրս եկեք այստեղից, ինքը ոչ հայ է, ոչ էլ առավելևս քրիստոնյա»,–ասաց Գևորգ Գևորգյանը՝ հավելելով, որ 18–ամյա եղբայրներին չի ճանաչում, անգամ անունները չգիտի։