2000 տարվա հաստատություն եկեղեցին չի կարող ինչ-որ պատահական մարդկանց գործողությունների հետևանքով ոչնչացվել, կազմալուծվել. Արշակ Սրբազան

«Պատկերացրեք՝ 2018 թվականին քրեական գործ է հարուցվել, որպես վկա հարցաքննվել եմ, հետո կարճվել է, 2025 թվականին վերստին բացվել է այդ քրեական գործն ու պարզվել՝ մեղադրյալը ես եմ։ Դա ուղեկցվել է  եկեղեցու դեմ տոտալ, ագրեսիվ արշավի գործողությունների հետ»,- դատական նիստից հետո լրագրողներին ասաց Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանը։

Արշակ Սրբազանն ասաց, որ եկեղեցին 2000 տարվա հաստատություն է, մեր ազգային ինքնության առանցքն է. «Իմ խորին համոզմունք այն է, որ 2000 տարի գոյատևելուց, ապրելուց, այս ազգի կյանքում էական դերակատարություն ունենալուց  հետո եկեղեցին չի կարող ինչ-որ պատահական մարդկանց գործողությունների հետևանքով ոչնչացվել, կազմալուծվել»։

Ըստ Սրբազանի, ակնհայտ է, որ որոշակի աշխարհաքաղաքական ասպեկտներ կան եկեղեցու դեմ իրականացվող այս գործողությունների խորքում, այդ մասին նշել են բազմաթիվ փորձագետներ, բայց ո՞վ ասաց, որ նախընթաց դարաշրջաններում նմանատիպ ասպեկտներ ևս չեն եղել եկեղեցու դեմ իրականացված հալածանքներում։

Արշակ Սրբազանը նշեց, որ այսօր խոսում են հիբրիդային հարձակումների մասին, և եկեղեցու նկատմամբ իրականացվող գործողություններն են ավելի շատ իրեն հուշում հիբրիդային պատերազմի մասին. «Ես չգիտեմ՝ ինչ գործողություններ են պլանավորել. մի օր վարչական լծակներ են օգտագործում, կառավարությունն է որոշումներ կայացնում...»։ 

Հարցին՝ ո՞վ կարող էր տարածել իրեն վերագրվող տեսանյութը, Սրբազանը պատասխանեց. «Գիտեք, այնտեղ ավելի շատ խանդոտ կնոջ ձեռագիր է երևում, քան, ասենք, տարբեր մարդկանց»։

Մանրամասն՝ տեսանյութում։

Աղբյուրը` Panorama.am