Պատերազմը, խաղաղությունը չպետք է ձևական խոսքով լինի, խաղաղությունը պետք է լինի երաշխավորված. Գագիկ Ծառուկյան

«Այսօր ոչ մեկը պատերազմ չի ուզում։ Պատերազմը, խաղաղությունը ոչ թե պետք է ձևական խոսքով լինի, Ադրբեջանի թելադրանքով՝ սա պետք է տաք, սա պետք է կատարեք, զորքերը քչանան, զենք չառնեք, իսկ իրենք ուժեղանան... Այստեղ  խաղաղություն չկա։ Դա թելադրանք է»,- դատարանի բակում լրագրողներին ասաց ԱԺ նախկին պատգամավոր, գործարար, բարերար, «Առաջարկ Հայաստանին» նախաձեռնության հիմնադիր  Գագիկ Ծառուկյանը՝ պատասխանելով հարցին, որ Նիկոլ  Փաշինյանը հայտարարել է՝ եթե առաջիկա ընտրություններում ՔՊ սահմանադրական մեծամասնություն չկազմի, սեպտեմբերին աղետալի պատերազմ է լինելու։

Ըստ Գ. Ծառուկյանի, այսօր եթե հնարավորություն տրվի, որ իրենք որոշողը լինենք, իսկ դրա բոլոր նախադրյալները կան, անմիջապես 3, 4, 5  հզոր, ազդեցիկ պետությունների հետ, որպես դաշնակից, փաստաթուղթ կստորագրեն և ճանճը չի տզզա այդ տարածքում։

«Դա կլինի երաշխավորված խաղաղություն։ Խաղաղությունը պետք է լինի երաշխավորված։

Մենք, փոքր պետություն լինելով, հզոր դաշնակիցների կարիք ունենք։

Այսօր ի՞նչն է երաշխավորված։ Մեր բարձունքների վրա, մեր հողերում ադրբեջանցիներն են նստած, մեր գերիները, մեր գեներալները, նախագահներն այնտեղ, սա՞ է խաղաղություն»,- ասաց Գագիկ Ծառուկյանը։ 

Աղբյուրը` Panorama.am