Հայաստանը ներկայացնող Ակոպովա-Ռախմանին զույգը 14-րդն է Օլիմպիական խաղերում

Միլանում և Կորտինա դ’Ամպեցոյում ընթացող 25-րդ ձմեռային Օլիմպիական խաղերում ավարտվեց գեղասահքի զույգերի մրցաշարը, որտեղ Հայաստանը ներկայացնում էր Կարինա Ակոպովա - Նիկիտա Ռախմանին զույգը: Երկու ծրագրերի արդյունքում Հայաստանի ներկայացուցիչները գրավեցին 14-րդ հորիզոնականը (ընդհանուր 180.66 միավոր):
Ամեն դեպքում, սա ուշագրավ, ինչ-որ տեղ պատմական եղելություն է հայկական սպորտի համար: Ձմեռային մարզաձևերում հիմնականում բացակա Հայաստանը կոնկրետ այս մարզաձևում (գեղասահք, զույգեր) ներկայանում էր առաջին անգամ: Եվ որակավորման փուլի հաղթահարումը՝ Արա Գևորգյանի «Արցախ» ստեղծագործության ելևէջների ուղեկցությամբ (66.27 միավոր), արդեն մեծ հաջողություն կարելի է համարել: Արժե ընդգծել, որ Կարինա Ակոպովան և Նիկիտա Ռախմանինը արժանապատվորեն ներկայացրեցին Հայաստանը: 

Իսկ առաջին տեղը, չնայած կարճ ծրագրում ունեցած ձախողմանը, գրավեց Ճապոնիան ներկայացնող Ռիկու Միուրա և Ռյուիչի Կիհարա զույգը՝ գրանցելով 231.24 միավոր արդյունք:
Երկրորդ տեղը գրավեցին ու Օլիմպիադայի արծաթե մեդալներին արժանացան Վրաստանի ներկայացուցիչներ Անաստասիա ՄԵտելկինան և Լուկա Բերուլավան: 
Բրոնզե պարգևի արժանացավ Գերմանիան ներկայացնող Միներվա Ֆաբիեն Խազե - Նիկիտա Վոլոդին զույգը:

Մեր մարզիկների համար ուրախանալով հանդերձ, այնուամենայնիվ նկատենք, որ այս ասպարեզում էլ մեր հարևան Վրաստանը առաջ անցավ: Վրացական սպորտի համար ձմեռային Օլիմպիական խաղերում արծաթե մեդալները, ինչ խոսք, պատմական նվաճում են: