Ֆիդանը սպառնաց՝ եթե Հայաստանում այլ ուժեր հաղթեն, Թուրքիան այլ ճանապարհով կգնա. Վիգեն Հակոբյան

168 TV-ի «Ռեվյու» հաղորդաշարի հյուրն է քաղտեխնոլոգ Վիգեն Հակոբյանը։

Խոսելով աշխարհաքաղաքական զարգացումների, մասնավորապես՝ ԱՄՆ նախագահ Դոնալդ Թրամփի նախաձեռնությամբ ստեղծված «Խաղաղության խորհրդի», Հայաստանի և Ադրբեջանի՝ այս նախաձեռնությանը միանալու Թրամփի հրավերն ընդունելու և ԹՐԻՓՓ նախագծի թեմայի շուրջ՝ Վիգեն Հակոբյանը կարծիք հայտնեց, որ ներկայիս աշխարհաքաղաքական բոլոր գործընթացները պետք է դիտարկել աշխարհի նոր վերաձևավորման տրամաբանության մեջ։

«Ձևավորվում է նոր աշխարհակարգ՝ խաղի նոր կանոններով, նոր ուժի կենտրոններով։ Ովքեր դիմանում են այս նոր աշխարհակարգի ձևավորման տեմպին և ռեսուրսային պայքարին՝ ապագայում իրենց ուրույն տեղն են ունենալու այդ համակարգում»,- կարծում է քաղտեխնոլոգը։
Ինչ վերաբերում է Թրամփի վարչակազմի կողմից «Խաղաղության խորհուրդը» որպես ՄԱԿ-ի պոտենցիալ փոխարինող դիտարկելու հարցին՝ Վիգեն Հակոբյանը չի կարծում, թե սա հենց այն կառույցն է, որը պետք է փոխարինի Միավորված ազգերի կազմակերպությանը։

Քաղաքագետն արձանագրում է՝ քանի որ հին աշխարհակարգը փլուզվել է, և այժմ արդեն չեն գործում հին աշխարհակարգով սահմանված խաղի կանոնները, այդ թվում՝ միջազգային իրավունքը, ընթացքի մեջ է այն փուլը, երբ նոր աշխարհակարգի ձևավորման գործընթացում ավելի շատ նախապատվությունը տրվում է ուժային գործոնին։ Նրա խոսքով՝ աշխարհի վերաձևավորման «ուժային, ջունգլիների օրենքի» փուլում ենք։

Հարցադրմանը, որ սովորաբար նոր աշխարհակարգերը միշտ պատերազմների հետևանքով են ձևավորվում, քաղաքագետը պատասխանեց՝ աշխարհն այսօր չհայտարարված, պերմանենտ պատերազմների մեջ է։

Վիգեն Հակոբյանը ԹՐԻՓՓ նախագծին Ռուսաստանի միանալու հնարավորություն է տեսնում։ Ըստ նրա՝ ռուսները չեն հրաժարվել 2020 թվականի նոյեմբերի 9-ի եռակողմ հայտարարության 9-րդ կետից։

Ինչ վերաբերում է ԹՐԻՓՓ նախագծի բուն էությանը, քաղտեխնոլոգը շեշտում է՝ ԹՐԻՓՓ-ն իր բովանդակությամբ միջանցք է, և Հայաստանն իրականում չի վերահսկելու այդ տարածքը։

Քաղաքագետի խոսքով՝ Թուրքիան և Ադրբեջանը գոհունակությամբ արձանագրեցին, որ դա իրականում «Զանգեզուրի միջանցքն» է՝ ԹՐԻՓՓ-ի անվան տակ։

Վիգեն Հակոբյանը որոշակի սպառնալիք է տեսնում Թուրքիայի արտգործնախարար Հաքան Ֆիդանի նախորդ շաբաթվա աղմկահարույց հայտարարության մեջ այն իմաստով, որ, եթե Փաշինյանը չվերընտրվի, և Հայաստանում այլ ուժեր հաղթեն, ապա Թուրքիան «այլ ճանապարհով կգնա»։

«Բացի այն, որ հայտարարվեց, որ «սա մեր տղան է», այստեղ շատ ավելի կարևոր է, թե ստորակետից հետո ինչ չասվեց։ Ֆիդանը հայտարարեց, որ աջակցություն է հայտնում Հայաստանի այսօրվա ղեկավարության՝ Փաշինյանի վարած «խաղաղության» քաղաքականությանը, և ըստ էության, ակնարկ արվեց, որ եթե այս քաղաքական կուրսը շարունակվի, ապա խաղաղություն կարող է լինել, բայց եթե այլ ուժեր հաղթեն, որոնք կգնահատվեն որպես «ռևանշիստներ», «նացիոնալիստներ» կամ «տեռորիստներ», ապա Թուրքիան այլ ճանապարհով կգնա։ Այստեղ կար ոչ միայն աջակցություն, այլ ավելի շուտ կար սպառնալիք, որ Թուրքիայի համար ընդունելի է միայն այս իշխանությունը»,- մեկնաբանեց քաղտեխնոլոգը։

Վիգեն Հակոբյանը Հայաստանի շուրջ աշխարհաքաղաքական շահերի բախման լուրջ ռիսկեր է տեսնում և կարծում է, որ Հայաստանն արդեն իսկ դարձել է «հիբրիդային պատերազմի» թատերաբեմ։

Ամբողջական հարցազրույցը՝ տեսանյութում։