Եթե ես լինեի հայ ժողովրդի փոխարեն, լրջորեն կանհանգստանայի․ Լավրով

«Մենք, իհարկե, ցավով ենք հետևում Հայ Առաքելական Եկեղեցու շուրջ իրավիճակին»,- այս մասին այսօր ամենամյա մամուլի ասուլիսի ընթացքում ասաց ՌԴ ԱԳ նախարար Սերգեյ Լավրովը՝ անդրադառնալով, այսպես կոչված, հիբրիդային պատերազմի թեմային ու Կայա Կալասի հայտարարությանը, թե ՀՀ-ում կիրառելու են մոլդովական սցենարը։

Նա հիշեցրեց, որ ՀՀ և՛ ԱԺ նախագահ Սիմոնյանը, և՛ վարչապետ Փաշինյանը վերջերս տված հարցազրույցում չհերքեցին, որ Ռուսաստանի Դաշնությունից Հայաստանի դեմ գոյություն ունեն հիբրիդային սպառնալիքներ և այդ սպառնալիքները կապ ունեն Հայ Առաքելական եկեղեցում իրավիճակի հետ։

«Մեզ մոտ սա, տարակուսանքից բացի, ոչինչ չի կարող առաջացնել։ Կարող եմ միայն նշել, որ Եվրամիության հետ մերձեցումն անհետևանք չի անցնում, քանի որ հենց Եվրամիությունն է անընդհատ խոսում Ռուսաստանի Դաշնությունից առաջացած հիբրիդային սպառնալիքների մասին։ Նրանք միջոցներ են տրամադրում նման աշխատանքների համար։

Վերջերս Հայաստանին տրամադրվեց 15 միլիոն եվրոյի տրանշ։ Եվ ես կասկած չունեմ, որ Բրյուսելի բյուրոկրատիան կստիպի մեր հայ ընկերներին վաստակել այս 15 միլիոն տրանշի յուրաքանչյուր ցենտը։

Ի դեպ, Հայաստանի համատեքստում, երբ նրանք փորձում են համոզել Հայաստանին հեռանալ Ռուսաստանից, Կայա Կալասը հայտարարում է, որ Երևանում գործելու են մոլդովական սցենարով։ Եթե հիշում եք, մոլդովական սցենարը ենթադրում էր կոպտորեն կեղծված ընտրություններ, որոնք Սանդուի իշխող ռեժիմը պարտվեց Մոլդովայի ներսում՝ ստանալով ձայների ընդամենը 44 տոկոսը։

Նա կարողացավ ի վերջո հայտարարել հաղթանակի մասին միայն Եվրոպայում բացված ավելի քան 200 ընտրատեղամասերում տեղի ունեցած կոպիտ կեղծիքների շնորհիվ»,- նշեց Լավրովը՝ ավելացնելով, որ մինչ Եվրոպայում 200 ընտրատեղամաս էր բացվել, Ռուսաստանում, որտեղ ամենամեծ մոլդովական Սփյուռքն է, բացվել էր ընդամենը 2 ընտրատեղամաս, իսկ Մերձդնեստրում՝ ընդամենը մեկ տասնյակ։

«Եվ նույնիսկ այդ դեպքում մերձդնեստրցիներին, ըստ էության, թույլ չէին տալիս քվեարկել։ Հետևաբար, եթե Կալասը բացահայտորեն խոստովանում է, որ Հայաստանում կայանալիք ընտրությունների ժամանակ կիրառվելու է մոլդովական սցենարը, ապա, եթե ես լինեի հայ ժողովրդի փոխարեն, լրջորեն կանհանգստանայի»,- ասաց Լավրովը։

ՌԴ ԱԳ նախարարն անդրադարձավ նաև Գյումրիի քաղաքապետ Վարդան Ղուկասյանի գործին՝ արտահայտելով իր մտահոգությունն այդ կապակցությամբ։

«Եվ մենք հույս ունենք, որ Հայաստանի քաղաքական գործիչները, ովքեր պաշտպանում են Ռուսաստանի հետ համագործակցության զարգացումն ու խորացումը, չեն ենթարկվի հետապնդման»,- ասաց նա:

Մանրամասները՝ տեսանյութում։
Աղբյուր՝ 168.am