Ըստ Փաշինյանի՝ բազմամիլիոնանոց պարգևավճարները տրվում են, որպեսզի պաշտոնյաները դատական ծախսեր իրականացնեն և... սա անեկդոտ չէ

«Կառավարության նիստի ժամանակ զեկուցվել է և ներդրվել կատարողականի հիման վրա վարձատրության նոր համակարգ, այսինքը ներդրվել է նոր ինստիտուտ»,-կառավարության ճեպազրույցների սրահում ասաց Նիկոլ Փաշինյանը՝ պատասխանելով իրեն միլիոնավոր դրամի պարգևավճար նշանակելու մասին հարցին։

Նա հայտարարեց, որ դրա նպատակն է կառավարության ծրագիրը և նրա իրականացումը դարձնել արդյունավետ։

«Սա 2018 թվականից մեր որդեգրած «0 կոռուպցիա» և «0 հանդուրժողականություն կոռուպցիայի նկատմամբ» քաղաքականության գործնական շարունակությունն է, որովհետև մենք որդեգրել ենք անբասիր և որևէ ազդեցությունից զերծ պաշտոնյայի տեսլականը և այդ տեսլականն իրականացնելու և կառավարության արդյունավետությունը բարձրացնելու համար մենք համարում ենք այդ որոշումն անհրաժեշտ»,- ասաց Փաշինյանը։

 Նրա խոսքով, կառավարությունը պետք է պարգևավճարների միջոցով պետական համակարգում աշխատանքի մրցունակությունը բարձրացնի, որովհետև որակյալ աշխատուժի արտահոսք կա պետական համակարգից դեպի մասնավոր համակարգ։

Նա նշեց, որ պետական բարձրաստիճան պաշտոնյաները չեն կարողանում իրենց իրավունքները պաշտպանել, որովհետև ունեն ֆինանսական սահմանափակումներ։

«Մենք դեպքեր ունենք, որ մարդիկ իրենց պարզ իրավունքները պաշտպանելու համար, որը, ճիշտ է, դատարանի որոշումով հասել են արդյունքի, բայց 1-1.5 մլն դրամի ծախսերից հետո դատարանները փոխհատուցում են իրենց ծախսերի 10 կամ 20 տոկոսը։ Մյուս կողմից մենք տեսնում ենք, որ հայտնի շրջանակները բազմամիլիոնանոց դրամների հայցեր են ներկայացնում պետական պաշտոնյաների դեմ և մենք այն գնահատում ենք , որպես պետական համակարգը կաթվածահար անելու հիբրիդային սպառնալիք»,- ասաց գործադիրի ղեկավարը։

 Ըստ Փաշինյանի՝ Հայաստանում ներդրումային գրավչությունը մեծացել, մեծ հոսքեր են կանխատեսվում և կոռուպցիոն ռիսկերից պետք է ապահովել պետական համակարգը՝ պարգևավճարների միջոցով։
Աղբյուրը` Panorama.am