Ով է Նիկոլ Փաշինյանին հարվածային գործիքի վրա նստացնելու հեղինակը. վերլուծաբան

«Նիկոլ Փաշինյանն այսօր փաստացի արել է ՔՊ նախընտրական երգի պրեմիերան: Երգի տեքստի հեղինակն ինքն է: Պարզ չէ, թե ով է Նիկոլ Փաշինյանին հարվածային գործիքի վրա նստացնելու հեղինակը»,-արձագանքելով Նիկոլ Փաշինյանի հրապարակած տեսանյութին՝ գրում է քաղաքական վերլուծաբան  Հակոբ Բադալյանը։

Նա շարունակում է.

«Որովհետեւ, այստեղ կարծես թե խախտվել է օրինակ ՀՀԿ 2017 թվականի նախընտրական հոլովակի «հեղինակային իրավունքը»:  Հիշեցնեմ, որ 2017  թվականին ՀՀԿ հոլովակում հարվածային գործիք էր նվագում վարչապետ Կարեն Կարապետյանը, որը գլխավորում էր ՀՀԿ նախընտրական ցուցակը:

Միայն թե, Կարեն Կարապետյանի պարագայում այդ ամենն ուներ ներդաշնակություն, հաշվի առնելով թե իմիջային հանգամանքները, թե նաեւ այն պարզ իրողությունը, որ Կարապետյանի այդ հետաքրքրությունը ու նախասիրությունը հայտնի էր վաղուց, իսկ Նիկոլ Փաշինյանի դեպքում պարզապես ակնառու է արհեստականությունը:

Իհարկե Փաշինյանի էլեկտորատին դա առանձնապես չի էլ հետաքրքրելու: Հարկ եղած դեպքում նրանք ցանկացածի առաջ կպնդեն, որ Նիկոլ Փաշինյանը ընդհանրապես հարվածային գործիք առաջին նվագողն է մարդկության պատմության մեջ»։

Բայց «ուդառնիկ» Փաշինյանի դրվագը միակը չէր այս օրերին: Իրենք իսկ հրապարակեցին նաև տեսանյութ, որտեղ պատկերված է, թե ինչպես են «հարվածային գործիքների» նույն միջոցառման ժամանակ Նիկոլ Փաշինյանի շուրջ խմբված «վերնախավային» քպ-ականները, կրկնվող շարժումներով ու մատ թափ տալով, ցատկոտում՝ «Ուր էլ գնաս, հետդ կգամ» երգի ելևէջների ներքո: 
Այս առնչությամբ, կարծում ենք, ամենից դիպուկ արձագանքներից մեկը ՀԱԿ փոխնախագահ ու վարչապետի թեկնածու Լևոն Զուրաբյանի գրառումն է. «Հինգ հազար մարդ պառկեցրել են գերեզմաններում, քանդել են Արցախը և Հայոց պետության ամրությունը, մի քանի տասնյակ քաղբանտարկյալ նստեցրել բանտերը, պղծել մեր հավատքը և սրբությունները, սերմանել պառակտություն ու անօրենություն, դադարեցրել Սահմանադրության և օրենքների գործողությունը և հիմա խելագարի պես դոփում են, ըստ էության, մեր զինվորների և արցախցիների շիրիմների վրա` ցուցադրական հրճվանքով: Ցինիզմը հենց այսպիսինը պետք է լինի` ԱՆՍԱՀՄԱՆ, ԱՆՆԱԽԱԴԵՊ: Իսկապես` աննախադեպ»:

Ի դեպ, կրկնվող շարժումների մասին (հազիվ թե այդ խմբակային ցատկոտումը կարելի է «պար» անվանել: Հայտնի է, որ կան «էքստատիկ պարեր», այսինքն, այնպիսի կրկնվող պարային շարժումներ, որոնք կատարողները էքստազի վիճակի մեջ են ընկնում: 
Իսկ հոգեբանությունը կրկնվող շարժումների առնչությամբ հուշում է, որ նման «պարը» կարող է լինել ինչ-ինչ տագնապներով պայմանավորված ենթագիտակցական պաշտպանական ռեակցիա: Այսինքն՝ մարդը ունենում է որոշակի տագնապներ, բայց կրկնվող շարժումներով, մարդը փորձում է դրանք հեռու վանել իրենից: Թե դա որքանո՞վ կապ ունի դիտարկվողի հետ, ավելի լավ է դիպլոմավորված մասնագետներն ասեն: