Թրամփը կանխատեսում է ԵՄ-ի անկումը, նշում որ 7 պատերազմ է կանգնեցրել և քննադատում է ՄԱԿ-ին՝ իր հեռասուֆլյորի չաշխատելու համար

Թրամփը ՄԱԿ-ի Գլխավոր ասամբլեայում իր  ելույթը սկսեց ՄԱԿ-ի ղեկավարությանը քննադատելուց, երբ տեսավ որ իր հեռասուֆլյորն չի աշխատում:

«...Ինձ համար ընդհանրապես դժվար չէ խոսել առանց հեռասուֆլյորի, հատկապես որ այն, միևնույն է, չի աշխատում։  Նման իրավիճակներում խոսքերը սրտից են բխում։ Բայց պետք է ասեմ. ով էլ որ պատասխանատու է այդ հեռասուֆլյորի  համար, ակնհայտորեն խորը խնդիրների մեջ է լինելու...»,- կես կատակ, կես լուրջ սկսեց իր ելույթը ԱՄՆ նախագահն:

Ըստ նրա՝ այսօրվա ԱՄՆ-ն աշխարի ամենադինամիկ զարգացող երկրներից է դարձել՝  իր վերնտրվելուց հետո:

«...Իմ ղեկավարության ներքո էներգիայի ծախսերը նվազել են, բենզինի գները, սննդամթերքի գները և հիփոթեքային վարկերի տոկոսադրույքները նվազել են, գնաճը հաղթահարվել է։ Միակ բանը, որ աճում է, ֆոնդային շուկան է, և այն ռեկորդներ է սահմանում...»,- նշել է Թրամփը։

Ըստ Թրամփի՝  Բայդենի վարչակազմի չորս տարիների ընթացքում երկիր է մուտք գործել 1 տրիլիոն դոլարից պակաս նոր ներդրումներ։ Մինչդեռ իր  նախագահության ութ ամիսների ընթացքում ԱՄՆ-ն արդեն ստացել է  ավելի քան 17 տրիլիոն դոլար։

ԱՄՆ-ի նախագահը հայտարեց, թե կանգնեցրել է 7 պատերազմ (այդ թվում՝ Հայաստանի և Ադրբեջանի անունները հոլովելով), ակնարկելով, թե ՄԱԿ-ը այդ հարցերում անգործունյա դրսևորում է ցուցադրել:

Թրամփը կրկին նշել է, որ ՄԱԿ-ից ԱՄՆ-ն ոչինչ չի շահել:

«...Հեռասուֆլյորի անսարքությունից բացի, ՄԱԿ-ից ստացա նաև  մի էքսկալատոր, որը բարձրանալու ճանապարհին կանգ էր առնում ուղիղ մեջտեղում...»,- հեգնեց Թրամփը ՄԱԿ-ի քարտուղարությանը։

Հետո Թրամփը անդրադարձավ ռուս-ուկրաինական կոնֆլիկտին, նշելով, որ դրա լուծումը հեշտ գործ չէ:

Նա մեղադրեց ԵՄ երկրներին, որոնք իրենից պահանջում են պատժամիջոցներ կիրառել Ռուսաստանի դեմ, երբ, ըստ ԱՄՆ նախագահի, իրենք են շարունակում գնել ռուսական էներգակիրները:

Ըստ պաշտոնական տվյալների՝ մինչ այսօր, ԵՄ երկրների էներգակիրների ավելի քան 20 տոկոսը ռուսական է: Իսկ միջնորդավորված ձևով գնումները հաշվելիս՝ այդ ցուցանիշը կգերազանցի 30 տոկոսը:

Բացի այդ, Թրամփը հայտարարում է, որ եթե ԵՄ-ն պատժամիջոցներ չի սահմանում նաև Չինաստանի և Հնդկաստանի հանդեպ, ապա նրանց պահանջները Թրամփին՝ խստացնել Ռուսաստանի դեմ պատժամիջոցները, կրում են երկրերեսանի բնույթ:

Արևմտյան փորձագետները Թրամփի այս հիմնավորումը բացատրում են երկու գործոնով:

Առաջինը՝ նա չի ուզում փչացնել իր հարաբերությունները Պուտինի հետ, և երկրորդ, եթե ԵՄ-ն ամբողջովին հրաժարվի ռուսական էներգակիրներից և պատժամիջոցներ մտցնի Չինաստանի դեմ, ապա դրանից ԱՄՆ տնտեսությունը էլ ավելի կշահի:

Այսպիսով, ըստ փորձագետների, իր այս մոտեցմամբ Թրամփը մեկ կրակոցով, փորձում է երկու նապաստակ սպանել:

Իսրայելի և Պաղեստինի կոնֆլիկտում, ինչպես և ենթադրվում էր, Թրամփը ամբողջովին աջակցեց Իսրայելին:

Անրադառնալով ԵՄ-ի երկրներին, Թրամփը նշեց, որ նրանք ներգաղթի պատճառով կարող են հայտնվել  շատ ծանր դեմոգրաֆիկ վիճակում:

Բացի այդ, ԱՄՆ նախագահը խիստ քննադատեց նաև ԵՄ-ի, այսպես կոչված «կանաչ քաղաքականության» օրակարգը:

 Մենք ազատվում ենք այսպես կոչված «վերականգնվող աղբյուրներից», նշեց Թրամփը։

Քամին չի փչում, այս հսկայական հողմային տուրբինները, ամենամեծ խաբեությունն է, որ վերջին տարիներին ներկայացնում էին մարդկությանը:

«...Սա երբևէ հորինված ամենաթանկ էներգիայի աղբյուրներից է։ Էներգիան պետք է եկամուտ ստեղծի, այլ ոչ թե վնասներ։ Այստեղ կորուստները այնքան մեծ են, որ առանց կառավարության հսկայական սուբսիդիաների դրանք նույնիսկ գոյություն չէին ունենա...»,- նշեց Թրամփը։

Ըստ նրա՝ նույն Չինաստանը վաճառելով այդ տուրբինները արևմտյան երկրներին, ինքն իր երկրում դա գրեթե չի օգտագործել, հասկանալով դրանց ոչ էֆեկտիվ լինելը:

Եվրոպան, սակայն, շարժվում է հակառակ ուղղությամբ և գտնվում է կործանման եզրին՝ «կանաչ» էներգիայի օրակարգի պատճառով, նշեց ԱՄՆ նախագահն։

«...1982 թվականին ՄԱԿ-ի շրջակա միջավայրի ծրագրի գործադիր տնօրենը կանխատեսեց, որ իբր, կլիմայի փոփոխությունը մինչև 2000 թվականը կհանգեցնի համաշխարհային աղետի: Նա ասաց, որ դա կլինի նույնքան անդառնալի, որքան միջուկային ապոկալիպսիսը: Ահա թե ինչ էր պնդում ՄԱԿ-ը այն ժամանակ: Եվ ի՞նչ պատահեց: Ոչինչ չպատահեց: 1989 թվականին ՄԱԿ-ի մեկ այլ պաշտոնյա հայտարարեց, որ տասը տարվա ընթացքում գլոբալ տաքացման պատճառով ամբողջ երկրներ կջնջվեն երկրի երեսից: Դա նույնպես տեղի չունեցավ: Եվ եթե մտածեք 1920-ական և 1930-ական թվականների մասին, այն ժամանակ,  մարդկանց վախեցնում էին «գլոբալ սառեցմամբ»: Հետո նրանք սկսեցին մարդկանց վախեցնել «գլոբալ տաքացմամբ»: Բայց երբ ջերմաստիճանը սկսեց իջնել, նրանք այն վերանվանեցին «կլիմայի փոփոխություն»: Իմ կարծիքով, սա աշխարհին երբևէ պարտադրված ամենամեծ խաբեությունն է...»,- վերջում նշեց Թրամփը, ավելացնելով, որ իրեն վատ է զգում, թե ինչպես են այսօր խաբում եվրոպացիներին, որի հետևանքները կլինեն իրենց համար անչափ տխուր:

ԱՄՆ նախագահը նշեց, որ ԱՄՆ-ն նույնպես ընթանում էր այդ ուղիով, սակայն իր վերընտրությամբ, նա կարողացել է կանգնեցնել այդ գործընթացը:

Թրամփն իր այս քաղաքականության տրամաբանությունը բացատրեց նրանով, որ գլոբալիստները որոշել էին եվրոպայից արտադրությունը տեղահանել դեպի զարգացող երկրներ:

Որի արդյունքում, ըստ նրա, այսօր, այսօր Եվրոպայում էլեկտրաէներգիայի վճարները չորսից հինգ անգամ ավելի բարձր են, քան Չինաստանում և երկուսից երեք անգամ ավելի բարձր, քան՝ Միացյալ Նահանգներում։

Ահա թե ինչու Ամերիկան ​​դուրս եկավ Փարիզի կլիմայական համաձայնագրից, նշեց Թրամփը։

Մենք հպարտ ենք ամբողջ աշխարհով մեկ էներգիա արտահանելով։ Մենք այժմ աշխարհում ամենամեծ արտահանողն ենք  դարձել, հպարատացավ Թրամփը, նշելով, որ նախկինում ԱՄՆ-ն գնում էր էներգակիրները այլ երկրներից:

Վերջում Թրամփը կոչ արեց պաշտպանել  մարդկանց ազատությունը ողջ աշխարհով մեկ, նշելով, որ դրա մեջ ենթադրում է նաև կրոնական ազատությունների պաշտպանությունը, այդ շարքում նշելով, որ այսօր ամենահալածվող կրոնը հենց քրիստոնեությունն է:

Վերջում ԱՄՆ նախագահը կոչ արեց մարդկությանը միասնանալ, նոր արժեքների հիման վրա, որտեղ չեն լինի խաբեություններ ու բռնություններ:

Արտակ Հակոբյան
Zham.am