Կիմ Չեն Ընը Հրվ. Կորեայի նախագահին հրավիրել է Փհենյան, ի պատասխան՝ ստացել պայման

Հյուսիսային Կորեայի առաջնորդ Կիմ Չեն Ընն առաջարկել է Հարավային Կորեայի նախագահ Մուն Չժե Ինին մոտ ապագայում այցելել Փհենյան։ Հրավերը փոխանցել է Ձմեռային օլիմպիական խաղերի առթիվ Հրվ. Կորեա այցելած Կիմ Չեն Ընի քույրը՝ Կիմ Յո Չժոնը, գրում է bbc.com-ը։

Կիմ Յո Չժոնը Հարավային Կորեայի նախագահի հետ հանդիպել է Հյուսիսային Կորեայից ժամանած բարձր մակարդակի պատվիրակության կազմում։ Հանդիպումը տեղի է ունեցել նախագահական պալատում, որը հայտնի է «Երկնագույն տուն» անունով։ Հատկանշական է, որ Կիմ Չեն Ընի քույրը 1950-1953թթ. Կորեական պատերազմի ավարտից հետո Փհենյանում իշխող տոհմի առաջին ներկայացուցիչն է, որ այցելել է հարևան երկիր:

Ինչպես հայտնում է «ՌԻԱ Նովոստի» գործակալությունը, ի պատասխան հրավերի, Մուն Չժե Ինը հայտնել է, որ կարող է Հյուսիսային Կորեա այցելել այն դեպքում, եթե դրա համար «պայմաններ ստեղծվեն»։

«Եկեք հասնենք դրան՝ ապագայում ստեղծելով անհրաժեշտ պայմանները»,- ասել է հարավկորեացի նախագահը։

Հիշեցնենք, որ վերջին մեկ տարում իրավիճակը Կորեական թերակղզում խիստ լարված է:

Փհենյանն արագ տեմպերով զարգացնում է միջուկային ծրագիրը՝ սպառնալով ոչ միայն տարածաշրջանային հարևաններին, այլև՝ Միացյալ Նահանգներին:

Աղբյուրը՝ Tert.am