Հաստատվեց ԱՄՆ-ի պետական բյուջեն. Հաջորդը փախստականության խնդիրն է

ԱՄՆ-ի նախագահն ուրբաթ օրը ստորագրեց երկրի բյուջեի օրինագիծը, որը նախապես հաստատվել էր Կոնգրեսում: Դրա արդյունքում վերաբացվեցինի դաշնային կառավարությանը պատկանող հաստատությունները, որոնք մոտ հինգ ժամ փակ էին մնացել անհամաձայնության արդյունքում:

ԱՄՆ-ի դաշնային կառավարության 650 էջանոց բյուջեն, որը հաստատվեց Կոնգրեսի, ապա մի քանի ժամ անց` նախագահ Դոնալդ Թրամփի կողմից, նախատեսում է հավելյալ 300 միլիարդ դոլար պաշտպանական ու ներքին ծախսերի համար:

Ու քանի որ բյուջեն հաստատվեց, մեծացան դրիմերների հույսերը, որ հասել է իրենց խնդիրը լուծելու ժամանակը: Հիշեցնենք, որ դրիմերներն այն երիտասարդներն են, որոնց մանուկ հասակում Միացյալ Նահանգներ են տեղափոխել առանց փաստաթղթերի ու հիմա նրանք կանգնել են երկրից արտաքսվելու վտանգի առջեւ:

Նրանցից 700 հազարը նախկին նախագահ Օբամայի վարչակազմի օրոք ստացան օրինական բնակվելու ու սովորելու կարգավիճակ, ինչի ժամկետը լրանում է մարտի սկզբին: Դեմոկրատ կոնգրեսականները նրանց այս խնդրի լուծումը կապում էին բյուջեն հաստատելու պայմանի հետ:

Սենատի դեմոկրատ փոքրամասնության ղեկավար Չաք Շումերը սա լավ գործարք է համարում` ավելացնելով, թե հիմա կարող են միասնաբար աշխատել հանուն դրիմերների երազանքների իրականացման:

Սենատի հանրապետական մեծամասնության ղեկավար Միթչ Մաքքոնելի խոսքերով, որեւէ սենատոր չի կարծում, որ այս բյուջեն կատարյալ է:

‘’Սակայն գիտեմ, որ սա մեր զինված ուժերի վերակառուցումը սկսելու ու ամերիկացիների շատ ու շատ խնդիրներ լուծելու համար ամենալավ հնարավորությունն է’’:

Իսկ այդ խնդիրներից առաջինն իհարկե ներգաղթի խնդիրն է: Ներգաղթի շուրջ քննարկումները կենտրոնանալու են նախագահ Թրամփի առաջարկած ծրագրի վրա, ինչն ընդգրկում է սահմանային անվտանգությանը, դրիմերների համար քաղաքացիության հնարավորություններ ստեղծելուն, գրին քարթի խաղարկությունն ու ընտանիքների վերամիավորման ծրագիրը դադարեցնելուն վերաբերող կետերը:

Մանրամասները՝ Ամերիկայի Ձայն -ում