Թուրքիայի խորհրդարանի հայազգի պատգամավոր Սելինա Դողանը Դիարբեքիրը կոչել է «Տիգրանակերտ»

Թուրքիայի ընդդիմադիր Ժողովրդահանրապետական կուսակցության անդամ, խորհրդարանի հայազգի պատգամավոր Սելինա Դողանը կուսակցության կազմակերպած Դիարբեքիր այցից հետո սոցցանցերից մեկում արած գրառման մեջ կիրառել է քաղաքի հայկական «Տիգրանակերտ» անվանումը:

Հայազգի պատգամավորի այս քայլը չի վրիպել իշխանամետ ազգայնական մամուլի աչքից, որը խիստ հակազդեցություն է ցույց տվել նման գրառմանը:

«Ինչպես հասկացվում է՝ Տիգրանակերտը հայերի՝ Դիարբեքիրին տված անունն է: Հայկական աղբյուրները պնդում են, թե Դիարբեքիրը մեր թվարկության առաջին դարում հիմնադրվել է այստեղ իր տիրապետությունը հաստատած հայ Տիգրան արքայի կողմից: Սելինա Դողանը, օգտագործելով Տիգրանակերտ անունը, կարծես փորձում է մեջտեղ բերել այն վարկածը, թե դա նաև հայկական քաղաք է: Երևում է, որ այս տիկինը մոտ ապագայում էլ չի հրաժարվելու նման ելույթներից», — գրել է թուրքական «Միլլիյեթ» պարբերականը:

Սելինա Օզուզուն Դողանը-  հայկական ծագմամբ թուրք կին պատգամավոր։ Նա վերջին 60 տարիներին առաջին անգամ Թուրքիայի Ազգային մեծ ժողով մտած առաջին հայերից է։

Ծնվել է 1977 թվականին Ստամբուլում։ Ստամբուլի ֆրանսիական Lycée Notre Dame de Sion ավագ դպրոցում միջնակարգ կրթություն ստանալուց հետո նա Գալաթասարայի համալսարանում սովորել է իրավաբանություն։ Այնուհետև Ստամբուլի Բիլգի համալսարանում ստացել է մագիստրոսի աստիճան։

Zham.am