Փաշինյանը սեղմօղակ է հայ ժողովրդի պարանոցին. Սեմյոն Բաղդասարով (տեսանյութ)

Մերձավոր Արևելքի և Կենտրոնական Ասիայի հետազոտությունների կենտրոնի տնօրեն Սեմյոն Բաղդասարովը Alpha News-ին մեկնաբանել է հայկական եկեղեցու վրա Հայաստանի իշխանությունների հարձակումը։

Ըստ փորձագետի՝ եկեղեցու վրա այս հարձակումն իրականացվել է Հայաստանի պատմական թշնամիների՝ Թուրքիայի և Ադրբեջանի թելադրանքով։

«Կարծում եմ, պատահական չէր, որ Էրդողանը Փաշինյանի խնդրանքով ընդունեց նրան, և այնտեղից վերադառնալուց հետո Փաշինյանը կտրուկ ակտիվացրեց իր գործունեությունը եկեղեցու դեմ։ Փաշինյանը շատ է ուզում, որ խաղաղության պայմանագիր կնքվի, բայց ոչ թե Հայաստանին խաղաղություն բերելու, այլ իր իշխանությունը պահպանելու համար։ Նա պատրաստ է կապիտուլյացիայի, բայց այնպես, որ բացարձակապես ոչինչ չվտանգի։ Հույսն այն է, որ պարոն Էրդողանը ճնշում կգործադրի Ադրբեջանի ղեկավարության վրա, և նրանք կստորագրեն այս պայմանագիրը։ Այն, ինչ ուզում է Ադրբեջանը, ուզում է նաև Թուրքիան և հակառակը»,-ասել է Բաղդասարովը։

Փորձագետը նշել է՝ Էրդողանը հասկանում է, որ Փաշինյանն ու իր թիմը հաջորդ տարի կպարտվեն ընտրություններում, և կգա նոր իշխանություն, որը կարող է հրաժարվել Փաշինյանի ստորագրած պայմանագրերից։

«Ստացվում է, որ լինելու է կապիտուլյացիա, դավաճանություն Փաշինյանի ու իր թիմի կողմից։

Բայց պայմանագիրը ոչ մի նոր կառավարության հարիր չէ, և նրանք կարող են չեղարկել այն։ Ուրեմն հարց է՝ ինչպե՞ս երկարացնել Փաշինյանի իշխանությունը։ Առաջին տարբերակը Հայաստանում հակամարտություն, բախումներ, անկարգություններ հրահրելն է, արտակարգ դրություն հայտարարելը, ընտրությունները չեղյալ հայտարարելը, սա առավելագույն խնդիրն է։ Իսկ նվազագույն խնդիրը, եթե առաջին տարբերակը չստացվի, ընդդիմությանը կտրուկ թուլացնելն է՝ ձերբակալելով նրա մի շարք առաջնորդների։

Իսկ Հայոց եկեղեցին կանգնած է ընդդիմության կողքին, քանի որ կանգնած է հայրենասիրության դիրքերում, և սա է հիմնական ուժը։ Եվ ուրեմն խնդիր էր դրվել պարզել եկեղեցու և ընդդիմության հետ հարցերը։ Հայ Առաքելական եկեղեցու ղեկավարությունը պետք է հստակ հասկանա, որ Փաշինյանը չի սահմանափակվի միայն երկու-երեք հոգևորականներով, նա ցանկացած պատրվակով կոչնչացնի ողջ Հայ Առաքելական եկեղեցին։

Երբ Փաշինյանը Թուրքիայում էր, հավաքեց կրոնական գործիչների, հայ ներկայացուցիչների, իսկ երբ մեկնեց եկեղեցի, Պոլսո պատրիարքարանի ներկայացուցիչները հրաժարվեցին նրա հետ հանդիպումից։ Պոլսո պատրիարքը թուրքական հատուկ ծառայությունների խստագույն վերահսկողության տակ է գտնվում, նրանք բոլորը ծառայել են թուրքական բանակում և առանց թուրքական ծառայությունների թույլտվության որևէ քայլ չեն անում։ Սա է թուրքական սցենարը։ Փաշինյանը Թուրքիայից եկավ գիտակցմամբ, որ պետք է աշխատի հօգուտ Հայաստանի և հայ ժողովրդի պատմական թշնամու։

Հուսով եմ՝ եկեղեցին դա հասկանում է։ Իհարկե, ցանկալի կլիներ, որ փոխզիջում լիներ, ես դեմ եմ ցանկացած սրացման։ Ամեն ինչ պետք է լինի օրենքով։ Եվ ամենակարևորն այն է, որ ընտրությունները պետք է տեղի ունենան 07.06.2026թ.-ին։ Փաշինյանը կպարտվի, իսկ նա դա չի ցանկանում։ Եվ հիմա նա կճնշի եկեղեցուն, ապա ընդդիմությանը, ապա բոլոր նրանց, ում հնարավոր է ճնշել։ Նա անկարգություններ է հրահրում վերը նշված նպատակներին հասնելու համար»,-ասել է Բաղդասարովը։

Փորձագետի կարծիքով՝ Փաշինյանը հայ ժողովրդի պարանոցին սեղմօղակ է։

«Փաշինյանն աշխատում է նրանց շահերից ելնելով և մեղադրում է Ռուսաստանին, որովհետև խնդիր է դրվել՝ մեղադրել Ռուսաստանին։ Հայ ժողովրդի թշնամին Բաքվում չէ, Անկարայում չէ, հայ ժողովրդի թշնամին Երևանում է։ Նա հանձնում է Հայաստանը։ Հայ ժողովրդի պատմության դավաճանի խորհրդանիշը Վասակ Սյունին էր, բայց՝ 1500 տարի առաջ։ Հիմա Փաշինյանն է Վասակ Սյունի երկրորդը։ Փաշինյանը սեղմօղակ է հայ ժողովրդի պարանոցին։ Այն, ինչ եղավ Արցախում, կարող է կատարվել ամբողջ Հայաստանում, երբ Հայաստանը մնա առանց հայերի, որոնք կարտաքսվեն երկրից։ Մենք հիմա ապրում ենք մի ժամանակաշրջանում, երբ ընդհանրապես ոչինչ չի աշխատում, չկան միջազգային օրենքներ և այլն, հիմա գործում է ուժի օրենքը»,- նշել է Բաղդասարովը։

Փորձագետի կարծիքով՝ Ռուսաստանը պետք է հասկանա, որ Հարավային Կովկասի համար պայքար է գնում։

«Մենք թերագնահատում ենք Փաշինյանին, նա խելացի, խորամանկ և շատ ճարպիկ մարդ է։ Հայաստանը Ռուսաստանի համար շատ լուրջ հենարան էր, և նրան պետք է դուրս մղել այնտեղից, և եթե դուրս մղվի, ապա Հարավային Կովկասը կանցնի ՆԱՏՕ-ի անդամ Թուրքիայի վերահսկողության տակ։ Ռուսաստանում դա պետք է հասկանան։ Երբ դա տեղի ունենա, Ռուսաստանը մեծ խնդիրներ կունենա հարավային սահմաններին։ Եվ հայ ժողովուրդը ևս պետք է գիտակցի, որ դա սեղմօղակ է իր պարանոցին և ավելի ու ավելի է սեղմվում»,-եզրափակել է Բաղդասարովը։