Լարված իրավիճակ․ ԱԱԾ աշխատակիցները Մայր Աթոռից փորձում են ձերբակալել Միքայել արքեպիսկոպոս Աջապահյանին (ուղիղ, լրացված)
ԱԱԾ աշխատակիցներն այս պահին գործողություն են իրականացնում Վեհարանում: Ոստիկանության աշխատակիցները ուժ են գործադրում հոգևորականների նկատմամբ։ Այնտեղ է նաև Վեհափառ Հայրապետը։
Քաղաքացիներ են ժամանում Մայր Աթոռ՝ ի աջակցություն եկեղեցու ու հոգևորականների։
Մայր Աթոռում մեկնարկել էր Քահանայից ժողովը, որին մասնակցելու նպատակով այնտեղ է նաև Շիրակի թեմի առաջնորդ Միքայել արքեպիսկոպոս Աջապահյանը:
Հիշեցնենք, որ առավոտյան մոտ 30 դիմակավորված անձինք ներխուժել են Շիրակի թեմի առաջնորդարան:
ՀՀ գլխավոր դատախազությունը քրեական վարույթ էր հարուցել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
***
Ամենայն Հայոց Կաթողիկոս Գարեգին Բ-ն հայտնեց, որ Միքայել Սրբազանը կմեկնի իրավապահների հետ՝ փաստաբանի ուղեկցությամբ, իսկ մյուս հոգևորականները կհավաքվեն Վեհարանում։
«Մենք կհավաքվենք ու եզրահանգումը կանենք մեր հետագա գործողությունների։ Մենք բոլորս ամեն ջանք ենք ներդնելու, որ արդարությունը վերականգնվի»,-ասաց Կաթողիկոսը։
***
Էս խելագարի ասածներն են անում, ես գնում եմ ԱԱԾ-ի հետ, հոգևորականները ինձ կհետևեն, այս մասին ասել է Միքայել Սրբազանը։
Այս պահին Վեհարանի բակում կրկին հրմշտոց է։
Քաղաքացիները և հոգևորականները թույլ չեն տալիս ԱԱԾ աշխատակիցներին բերման ենթարկել Միքայել Սրբազանին։
Միքայել Սրբազանը մեքենայի մոտից Կաթողիկոսի հետ վերադարձավ Վեհարան։
***
Միքայել Սրբազանի ինքնազգացողությունն է վատացել։ Այս մասին լրագրողների հետ զրույցում ասաց Մայր Աթոռի հոգևորականներից մեկը։
Նա նշեց, որ Միքայել Սրբազանի ինքնազգացողությունը վատացել է ԱԱԾ աշխատակիցների և ոստիկանների կողմից հոգևորականներին ու քաղաքացիներին քաշքշելու հետևանքով։
Հետևեք մեզ Facebook-ում