ԱՄՆ-ը լքում է նաև Մերձավոր Արևելքը. իսկ Հարավային Կովկասի մասով ի՞նչ որոշում կա

Հայաստանը մեծ Եվրասիայի մաս է, որի հետ ԱՄՆ-ն որևէ կապ չունի:
Քաղաքագետ Բենիամին Մաթևոսյանը Alpha News-ի եթերում անդրադարձել է թեմային: 

«Բազմիցս արձանագրել ենք, որ «Հայաստանը չի ապրում վակուումում»։ Շուրջը տեղի են ունենում բազմաթիվ գործընթացներ, որոնք կարող են անմիջական ազդեցություն ունենալ Հայաստանի և ողջ տարածաշրջանի կայունության ու անվտանգության մակարդակի վրա։

Մինչ հայ հասարակությանը փորձում են պարտադրել ներազգային ատելության օրակարգ (այս անգամ փորձում են հայերին բաժանել «ՀԱԵ կողմնակից կամ հակառակորդ» սկզբունքով), աշխարհում տեղի են ունենում տեկտոնական աշխարհաքաղաքական տեղաշարժեր։ Այն, ինչի մասին մենք խոսում էինք դեռևս 2024 թվականի սկզբին, այսօր դարձել է մեր առօրյան՝ ԱՄՆ-ը հեռանում է և Մերձավոր Արևելքից, և Եվրոպայից՝ ուժերը կենտրոնացնելու համար Ասիա-Խաղաղօվկիանոսյան տարածաշրջանում Չինաստանի զսպման վրա։

Նախօրերին, իր նոր հարցազրույցում, ԱՄՆ նախագահ Դոնալդ Թրամփը, խոսելով Մոսկվայի և Կիևի միջև բանակցությունների մասին, ասել էր. «Սա առաջընթացի ավարտն է: Ուկրաինայի և Ռուսաստանի միջև բանակցությունները փակուղի են մտել «սխալ» թիրախների վրա հարվածներից հետո (նկատի ունի ռուսական օդանավակայանների վրա հարձակումները)։ Մենք հասել ենք որոշակի առաջընթացի, և հանկարծ նրանք ռմբակոծում են այն, ինչը չպետք է ռմբակոծեին։ Եվ սա առաջընթացի ավարտն է»։

Ռուսաստանի ռազմավարական ավիացիայի վրա հարձակումները ԱՄՆ-ին տվել են լեգիտիմ առիթ նվազագույնի հասցնելու իր մասնակցությունը ուկրաինական պատերազմին, ինչից Թրամփն օգտվում է։

Միաժամանակ Միջազգային ատոմային էներգիայի գործակալության (ՄԱԳԱՏԷ) ղեկավար խորհուրդն ընդունել է բանաձև, ըստ որի՝ Թեհրանը լիովին չի կատարում իր պարտավորությունները միջուկային ոլորտում։ Բանաձևին արձագանքել են ոչ միայն նավթի գները համաշխարհային շուկաներում, այլև Իրանը, որը ՄԱԳԱՏԷ-ի այս որոշման մեջ տեսել է ոչ միայն ճնշման փորձ՝ Թեհրանի և Վաշինգտոնի բանակցությունների շրջանակներում, այլև արդարացում միջազգային կոալիցիայի կողմից իրանական միջուկային օբյեկտներին հարվածելու համար։ Իրանի պաշտպանության նախարար Ազիզ Նասիրզադեն հայտարարել է, որ զինված հակամարտության դեպքում Իրանը հարված կհասցնի Մերձավոր Արևելքում գտնվող ամերիկյան բոլոր ռազմաբազաներին։

Բացի այդ, Իրանի պետական լրատվամիջոցները հրապարակել են Իսրայելի միջուկային ծրագրի գաղտնի փաստաթղթերի առաջին փաթեթը, որոնք վկայում են, որ ՄԱԳԱՏԷ-ի ղեկավար Ռաֆայել Գրոսին իր գործողությունները սերտորեն համաձայնեցրել է Իսրայելի հետ և հետևել նրա հրահանգներին։

Համաձայնեք՝ ՄԱԳԱՏԷ-ի բանաձևը և Իրանի արձագանքը դարձան հիանալի առիթ Վաշինգտոնի համար՝ Մերձավոր Արևելքից զորքեր դուրս բերելու համար, այնպես չէ՞։ Ռուսաստանն էլ ստանում է իր սեփական աշխարհաքաղաքական ազդեցության գոտին։ Պատահական չէ, որ այսօր մենք տեսնում ենք, որ նույնիսկ ԱՄՆ պետքարտուղար Մարկո Ռուբիոն շնորհավորում է ռուսներին Ռուսաստանի օրվա կապակցությամբ։ Փոփոխություններն ավելի քան ակնհայտ են։

ԱՄՆ-ը հեռանում է և Մերձավոր Արևելքից, և Ուկրաինայից։ Իսկ ի՞նչ է հայտնի Հայաստանի և Հարավային Կովկասի մասին։

Հայաստանի արտգործնախարար Արարատ Միրզոյանը, ԱՄՆ Պետքարտուղարության ներկայացուցիչ Ջոշուա Հակի՝ Հայաստան կատարած վերջին այցից հետո, խորհրդարանում 2024 թվականի պետական բյուջեի կատարման քննարկման ժամանակ հայտարարեց, որ ամերիկյան կողմը հավաստիացրել է՝ «Ոչինչ չի փոխվում, և մենք մնում ենք ռազմավարական գործընկերներ»։

Միրզոյանը նկատի ունի, որ ներկայիս ամերիկյան վարչակազմը հավատարիմ է 2025 թվականի հունվարին ստորագրված Հայաստանի Հանրապետության և Ամերիկայի Միացյալ Նահանգների ռազմավարական գործընկերության խարտիային։

Հայաստանի իշխանությունները շարունակում են անտեսել ոչ միայն աշխարհաքաղաքական քարտեզը, այլև անգամ լրահոսը։Հիշեցնենք, որ փետրվարին ԱՄՆ պաշտպանության նախարար Փիթ Հեգսեթը հայտարարել է, որ ԱՄՆ-ն այլևս չի կարող ապահովել Եվրոպայի անվտանգությունը և մտադիր է կենտրոնանալ Չինաստանի զսպման վրա Ասիա-Խաղաղօվկիանոսյան տարածաշրջանում։

Իրականությունն այն է, որ Հայաստանը մեծ Եվրասիայի մի մասն է։ Եվ որքան շուտ երկիրը ընդունի իր տեղը քարտեզի վրա և իր աշխարհաքաղաքական ինքնությունը, այնքան մեծ կլինեն պետականության և ազգային ինքնության պահպանման հնարավորությունները։

Մտածե՛ք այդ մասին․․․»։