Վահե Հովհաննիսան. «Էլիտան իր քեֆերով, միջնադարյան արևելյան բարքերով հետադիմական է» (Տեսանյութ)

«Երկիր Մեդիայի» «Երկրի հարցը» հաղորդման հյուրը ԱԺ նախկին պատգամավոր, «Այլընտրանքային նախագծեր խմբի» անդամ Վահե Հովհաննիսյանն է

Զրույցի թեման ներքաղաքական զարգացումներն են, անցումը խորհրդարանական համակարգին:

«Իշխանության մեջ էլ դուրս էլ կան առաջադեմ, լուրջ անհատներ, բայց չի ձեւավորվում այն համակարգը, որ առաջադիմական գաղափարներն առաջ կտանի: Ըստ իս, Հայաստանում գոյություն ունի առաջադիմական եւ հետադիմական ուժերի ջրբաժան: Առաջադիմականները հասկանում են, որ այսպես չի կարելի, եւ որ 21-րդ դարի լայն հնարավորությունների առաջ մեր դուռը պետք է բացվի: Առաջադիմականները սկզբնական փուլում փոքրամասնություն են կազմելու, բայց հասկանում են, որ երկիրը պետք է արդիականացվի:

Հետադիմականներին իրենց այսօրվա քեֆերը, դղյակները, միջնադարյան, արեւելյան բարքերը ձեռնտու են: Հիմա կամ մենք կարողանալու ենք ինչ որ բան փոխել, եւ տա Աստված որ դա համընկնի իշխանության վերեւից եկող փոփոխությունների հետ եւ մեր երկիրը տանենք սահուն զարգացմ,ան եւ արդիականացման կամ առաջանալու է այստեղ մեր մնալ, չմնալու հարցը»,- ընդգծել է Վահե Հովհաննիսյանը:

Վահե Հովհաննիսյանը շեշտել է, որ քաղաքացին այսօր իրեն օտարված է զգում պետությունից: «Քաղաքական կյանքը Հայաստանում շատ երկար ժամանակով փակ էջ է, քանի դեռ կա այս ընտրական համակարգը՝ ռեյտինգային ընտրակարգը»,- ընդգծել է նա:

«Հարեւան երկրներում կարեւոր, շատ կարեւոր գործընթացներ են ընթանում, բայց մեր վերնախավը զբաղված է իր դղյակներով եւ բանկի հաշիվներով»,- ասել է Վահե Հովհաննիսյանը:

«Այն հասարակական տրամադրությունները, հետաքրքրությունները, որ կան մեզ մոտ մի տեսակ պետություն չունեցող հասարակության տրամադրություններ են»,- ցավով նշել է նա:

Վահե Հովհաննիսյանն ընդգծել է, որ իր կարծիքով երկրի թիվ մեկ խնդիրներից մեկն այն է, որ 21-րդ դարը Հայաստան չի մտնում:

«Մենք ունենք փայլուն, բայց փոքրաթիվ առաջադեմ հատված, որոնց հնարավորությունները փակ են: Եթե նրանք տեսնեն, որ առաջընթացի հնարավորություն չկա, ապա գնալու են այս երկրից կամ արդեն գնում են: Հետադիմականներն իրենց քեֆերի մեջ խեղդվելու են: Այսպես հնարավոր չէ շարունակել, պետք է փոխվեն, պետք է երկիրը փոխվի»,- շեշտել է Վահե Հովհաննիսյանը:

Մանրամասները՝ տեսանյութում:

Zham.am