Մոսկվան և Կիևը նոր հանդիպում կանցկացնեն Ստամբուլում

Ռուսաստանի և Ուկրաինայի պատվիրակությունները երկուշաբթի օրը Ստամբուլում կանցկացնեն ուղիղ բանակցությունների երկրորդ փուլը։ Հանդիպման մեկնարկը սպասվում է ժամը 14:00-ին՝ Չիրաղան պալատում։ Նոր հանդիպման մասին մայիսի 28-ին հայտարարել է Ռուսաստանի արտաքին գործերի նախարար Սերգեյ Լավրովը։

«Ռուսական կողմը, ինչպես պայմանավորվել էինք, օպերատիվ կերպով մշակել է համապատասխան հուշագիր, որը ներկայացնում է մեր դիրքորոշումը ճգնաժամի խորքային պատճառները վստահորեն հաղթահարելու բոլոր ասպեկտների վերաբերյալ։

Մեր պատվիրակությունը՝ Վլադիմիր Մեդինսկու ղեկավարությամբ, պատրաստ է ներկայացնել այդ հուշագիրը Ուկրաինայի պատվիրակությանը և տալ անհրաժեշտ բացատրություններ ուղիղ բանակցությունների երկրորդ փուլում, որը կկայանա Ստամբուլում առաջիկա երկուշաբթի օրը՝ հունիսի 2-ին», — նշել է նա այդ ժամանակ։ Իր հերթին, Ուկրաինայի ԱԳ նախարար Անդրեյ Սիբիգան հայտարարել է, որ Ուկրաինան շահագրգռված է Ստամբուլում Ռուսաստանի հետ բանակցությունների շարունակության հարցում։ Բանակցություններին հետևելու համար միջազգային լրատվամիջոցների ավելի քան 100 ներկայացուցիչներ են ժամանել Ստամբուլ։