Արմեն Սարգսյան. Հայաստանի քաղաքական էլիտայի հետ քաղաքակրթական հակասություններ չունեմ (Տեսանյութ)

Մեծ Բրիտանիայում ՀՀ արտակարգ և լիազոր դեսպան, ՀՀ նախագահի պաշտոնում ՀՀԿ թեկնածու առաջարկված Արմեն Սարգսյանը պնդում է՝ Հայաստանի քաղաքական էլիտայի հետ քաղաքակրթական հակասություններ չունի:

«Շանթ» հեռուստաընկերությանը տված հարցազրույցում Արմեն Սարգսյանը անդրադարձել է պաշտպանության նախկին նախարար Վազգեն Սարգսյանի հետ ունեցած հակասությունների ու նրա հետ վիճելու մասին վերջին շրջանում ակտիվորեն շրջանառվող տեղեկություններին:

Նրա խոսքով, տարածվող տեղեկությունները սուտ լուրեր են, որոնք կարող են ազդեցություն ունենալ ոչ միայն երկրում ներքին, այլ նաև միջազգային հարաբերությունների վրա:

«Ես քսան տարի չեմ խոսել այդ մասին, որովհետև հեշտ չէ անձնական կյանքը պատմել բոլորին: 1997-ին ծանր հիվանդությամբ հիվանդացա: Սկզբում չէի գիտակցում դրա ծանրությունը: Ես երախտապարտ եմ մի քանի մտերիմների, որոնք ինձ հորդորեցին զբաղվել իմ առողջությամբ: Բժշկի զննությունից հետո պարզվեց լուրջ հիվանդություն ունեմ ու պետք է վիրահատվեմ: ՀՀ նախագահին ասացի այդ մասին, և նա ու շատ գործընկերներ պնդեցին, որ շտապ մեկնեմ վիրահատվելու: Ես երախտապարտ եմ նրանց, որ նրանք ինձ պնդեցին մեկնել Հայաստանից և վիրահատվել արտերկրում: Վիրահատվեցի ու մեկ ու կես տարի շատ ծանր բուժման ճանապարհ եմ անցել: Վստահ եմ, որ եթե նրանք ինձ չհամոզեին մեկնել Հայաստանից, ապա դուք այժմ ուրիշի հետ հարցազրույց կանեիք», - նշեց Ա.Սարգսյանը։

Սարգսյանը նաեւ նշել է, որ Սերժ Սարգսյանի առաջարկն իր համար «անսպասելի սպասվածն էր»:

«Երկար տարիներ մարդիկ իմ անունը շահարկել են ամեն ընտրության ժամանակ, ես դրան շատ հանգիստ էի վերաբերվում: Այդ տարիներին նման հաղորդագրություններին հումորով էի վերաբերվում», - ասաց Արմեն Սարգսյանը «Շանթ» հեռուստաընկերությանը տված հարցազրույցում:

Նա հիշեցրեց, որ դեսպանի պաշտոնն էլ, երբ իրեն առաջարկել է հանրապետության նախագահը 2013 թվականին, դարձյալ ժամանակ է խնդրել` մտածելու, և համաձայնվել է՝ պայմանով, որ աշխատելու է առանձ վարձատրության։

«Համարում էի, որ սա իմ կողմից հայրենիքին լրիվ չվերադարձված պարտքի մի մասն է: Շատ անսպասելի չէր, իհարկե, նախագահի առաջարկը, բայց դիրանից առաջ ես նրա հետ նման խոսակցություն չեմ ունեցել: Առաջարկությունը շատ մեծ պատիվ է: Շնորհակալ եմ, որ նախագահը հասկացավ, որ ես պետք ունեմ ժամանակի, մտածելու: Դրա համար շատ պատճառներ կան», - նշեց Արմեն Սարգսյանը:

«Հարցը միայն այն չէ, ուզում ես, թե ոչ, պատրաստ ես, թե ոչ, այլ նաև այն, թե ինչ ես անելու` առաջարկն ընդունելու դեպքում», - ընդգծեց նա։

Մանրամասները՝ տեսանյութում:

Zham.am