ԵՄ-ն միջամտո՞ւմ է Հայաստանի խորհրդարանական ընտրություններին

Քաղաքագետ Բենիամին Մաթևոսյանն Alpha News-ի եթերում «Վերնագիր» հեղինակային հաղորդման ընթացքում ներկայացրել է թեմայի շուրջ մասնագիտական վերլուծություն, որում մասնավորապես ասվում է. «Արտաքին միջամտության հետևանքները և ռիսկերը Հայաստանի ընտրական գործընթացում:

Ուրբաթ, մայիսի 23-ին, Նիկոլ Փաշինյանը հայտարարել է, որ 2026 թվականին գարնանը Հայաստանում կանցկացվի Եվրոպական քաղաքական համայնքի գագաթնաժողովը։ «Պատիվ է Եվրոպական քաղաքական համայնքի առաջնորդներին ընդունել մեր երկրում, և ես շնորհակալություն եմ հայտնում բոլոր առաջնորդներին՝ այս որոշմանն աջակցելու համար», — հայտնել է Փաշինյանը։

Հիշեցնենք,որ Եվրոպական քաղաքական համայնքը միջկառավարական ֆորմատ է, որը հիմնադրվել է Եվրոպայի ապագայի վերաբերյալ քաղաքական և ռազմավարական քննարկումների համար։ Այն առաջարկել է Ֆրանսիայի նախագահ Էմանուել Մակրոնը 2022 թվականի մայիսին։ Ինչպես նշել է Հայաստանում այցով գտնվող ՌԴ ԱԳ նախարար Սերգեյ Լավրովը, այս ձևաչափը ստեղծվել է Ուկրաինայում ռազմական գործողությունների սկզբում և միավորել է ԵԱՀԿ-ի եվրոպական անդամներին՝ բացառելով Ռուսաստանը և Բելառուսը։ Այլ կերպ ասած՝ այս ձևաչափը ստեղծվել է Մոսկվայի միջազգային մեկուսացումը հաստատելու համար։

«Մենք մեր գնահատականը տվել ենք այդ նախաձեռնությանը, հուսով եմ, որ դա հասկանալի է և հարգանքով կընկալվի, ինչպես մենք ենք հարգանքով ընկալում մեր գործընկերների և դաշնակիցների գործողությունները ԱՊՀ և ՀԱՊԿ շրջանակներում»,- ասել է ՌԴ նախարարը։

Հայաստանը «լսեց» Ռուսաստանի դիրքորոշումը և որոշեց անցկացնել գագաթնաժողովը։
Կանխատեսելի է, որ Ռուսաստանից կհայտարարեն, որ սա Երևանի ինքնիշխան իրավունքն է։ Կհայտարարեն և ճիշտ կլինի, սակայն ՌԴ-ից չեն մանրամասնի՝ արդյոք սա դրական ինքնիշխանություն է, թե՝ բացասական, տոքսիկ ինքնիշխանություն է։ Օրինակ՝ 2020 թվականի հոկտեմբերի 19-ին ինքնիշխանությունը բացասական, տոքսիկ արտահայտություն ունեցավ, երբ Փաշինյանն «ինքնիշխան որոշմամբ» հրաժարվեց դադարեցնել պատերազմը, և արդյունքում Շուշին դարձավ ոչ թե ռուս խաղաղապահների ռազմաբազա,այլ ադրբեջանա-թուրքական զինյալների հենակետ Արցախում։

Հստակ է, որ երևանյան այս գագաթնաժողովը Նիկոլ Փաշինյանին անհրաժեշտ է ընտրություններին նախորդող փուլում՝ որպես քարոզչական գործիք։ Եվրոպան նույնպես դա հասկանում է, և այդ պատճառով հենց Երևանին վստահվեց ֆորումը։ Պարզ ասած՝ Հայաստանի ընտրական մրցավազքում առաջին քայլն անում է Եվրոպան։ Բրյուսելը կապահովի Փաշինյանի համար դրական տեղեկատվական ֆոն։ Մի զարմացեք, եթե նա եվրոպական առաջնորդների լուսանկարներով շրջի գյուղերով և հայտարարի․ «Մենք չհասցրեցինք հասնել ԵՄ-ին, բայց Եվրոպան ինքն է եկել մեզ մոտ»։

Հաշվի առնելով Ռումինիայում անցկացված ընտրությունների պատմությունը, երբ Ֆրանսիայի հետախուզության ղեկավարը փաստացի անձամբ միջամտեց ընտրություններին՝ պահանջելով սահմանափակումներ պահպանողական ուժերի համար Telegram-ում, պարզ է, որ ԵՄ-ի միջամտությունը Հայաստանի ներքին գործերին չի սահմանափակվի միայն ֆորումով։

Հիշեցնենք, որ Telegram-ի հիմնադիր Պավել Դուրովի խոսքերով՝ Ֆրանսիայի հետախուզության (DGSE) ղեկավար Նիկոլա Լեներն պահանջել էր արգելափակել Telegram-ում բոլոր պահպանողական ռումինացի քաղաքական գործիչների հաշիվները։ Սա տեղի է ունեցել երկրի նախագահական ընտրությունների երկրորդ փուլում։ Ընտրությունների երկրորդ փուլի արդյունքներով Ռումինիայում հաղթեց «ճիշտ» պրոեվրոպական թեկնածուն՝ Բուխարեստի քաղաքապետ Նիկոլա Դանը (53,62%)։ Նրա մրցակիցը՝ ծայրահեղ աջ «Ռումինացիների միավորման դաշինք» կուսակցության ղեկավար Ջորջե Սիմիոնը, հավաքեց 46,38%։

Կարևոր է, որ այս գեոպոլիտիկ նրբությունները հասկանա նաև Հայաստանի ընդդիմությունը և ծրագրեր մշակելիս հաշվի առնի նոր իրականությունը։

Ինչ վերաբերում է Հայաստանի Հանրապետությանը, ապա այսօր ևս մեկ անգամ ասվեց այն, թե ինչ կկատարվի ՀՀ-ի հետ, եթե Փաշինյանը պահպանի իշխանությունը։ ՀՀ Սահմանադրությունը կփոփոխվի՝ հարմարեցվելով Բաքվի հետ «խաղաղության պայմանագրին»։ Այս մասին հայտարարել է Նիկոլ Փաշինյանը դիվանագիտական «Երևանյան դիալոգ» ֆորումում։ Եթե դա տեղի ունենա, ապա ոչ թե 60, այլ 100 տոկոսով Հայաստանը կդառնա «արևմտյան Ադրբեջան», քանի որ երկրի հիմնական օրենքը կկազմվի Բաքվի թելադրանքով։

Մտածե՛ք այդ մասին․․․»։